कर्णाली प्रदेशभर २६ हजार मतदाता थपिएका छन् । निर्वाचन आयोगले फोटोसहितको मतदाता नामावलीमा नाम दर्ता तथा अद्यावधिकका लागि तोकेको अवधिभित्र कर्णालीका १० जिल्लामा २६ हजार ६३५ जनाले नाम दर्ता गराएका हुन् । अहिले थपिएको मतदाताको संख्यालाई आधार मान्ने हो भने कर्णालीको कुल जनसंख्याको करिब ६२ प्रतिशत संख्या मतदाताको पुगेको देखिन्छ ।
उनका अनुसार सबैभन्दा धेरै मतदाता सुर्खेतमा थपिएका छन् । सुर्खेतमा ७ हजार ३६२ जनाले यो अवधिमा नाम दर्ता गराएका हुन् । आगामी फागुन २१ गतेका लागि तोकिएको प्रतिनिधि सभाको निर्वाचनका लागि निर्वाचन आयोगले गत असोज १० गतेदेखि मतदाता नामावलीमा नाम दर्ता तथा अद्यावधिकका लागि समय तोकेको थियो । सुरुमा कात्तिक ३० गतेसम्म यसको समय तोकिएको भएपनि प्रधानमन्त्री सुशिला कार्कीको निर्देशनपछि पुनः थप गरी मंसिर ५ गतेसम्म समय थप गरिएको थियो ।
निमित्त प्रदेश निर्वाचन अधिकृत चौलागाईका अनुसार नयाँ मतदाता थपिने दोस्रोमा दैलेख जिल्ला रहेको छ । दैलेखमा ३ हजार ६२६ जना मतदाता थपिएका हुन् । यस्तै कालीकोटमा १ हजार ७७६, जुम्लामा ३ हजार ३६, हुम्लामा ८२४, मुगुमा ७७४, डोल्पा १ हजार ७, जाजरकोट २ हजार २१०, सल्यानमा ३ हजार १८० र रुकुम पश्चिम २ हजार ८४० जना मतदाता यो अवधिमा थपिएका हुन् ।
कर्णालीमा यसअघि १० लाख ६ हजार ८३४ जना मतदाता थिए । अहिले थपिएकासहित जोड्दा फागुन २१ गते तोकिएको निर्वाचनका लागि कुल मतदाता १० लाख ३३ हजार ४६९ जना पुगेका छन् । यो मतदाता संख्या कर्णालीको कुल जनसंख्याको झण्डै ६२ प्रतिशत हो । राष्ट्रिय जनगणना २०७८ अनुसार कर्णालीको कुल जनसंख्या १६ लाख ८८ हजार ४१२ रहेको छ । यो अन्तिम विवरण भने होइन । यीमध्ये कतिले अद्यावधिक गराए, कतिले नयाँ दर्ता गराए भन्ने यकिन हुन बाँकी छ । कर्णाली प्रदेश निर्वाचन कार्यालयका निमित्त प्रमुख नन्दराम चौलागाईका अनुसार अन्तिम विवरण निकाल्न बाँकी छ । ‘कतिले नयाँ मतदाताका लागि नाम दर्ता गराए र कतिले अद्यावधिक गरे भन्ने अहिले नै खुलिसकेको छैन, यसको अन्तिम विवरण निकाल्न बाँकी छ ।’ उनले भने ।
यसपटक राष्ट्रिय परिचय हुनेले मतदाता नामावलीका लागि बायोमेट्रिक (जैविक तथ्यांक) दिन निर्वाचन कार्यालयमा पुग्नुपर्ने झन्झट हटाएपछि यो कार्यक्रमका लागि धेरै हदसम्म सहयोग पुगेको थियो । यो व्यवस्था आयोगले कात्तिक २७ गतेबाट मात्र गरेको थियो । मतदाता नामावलीमा नाम दर्ता गराउन आयोगको वेब साइटबाट अनलाइन फारम भर्दा राष्ट्रिय परिचय पत्रको नम्बर राखेपछि व्यक्तिगत विवरण समेत आउने र जैविक तथ्यांकपनि त्यतैबाट आउने भएपछि यो व्यवस्थाले झन्झट कम भएको थियो । प्राविधिक रुपमा त्यो प्रयोग सफल भएपछि अयोगले राष्ट्रिय परिचयपत्र नम्बर राखेर मतदाता नामावलीका लागि अनलाइन आवेदन दिन कात्तिक २७ गते आह्वान गरेको थियो ।
कर्णाली प्रदेशमा १ हजार ४७६ वटा मतदान केन्द्र छन् । आगामी फागुन २१ गते कर्णाली प्रदेशका १० जिल्लाका १२ जना प्रतिनिधि सभा सदस्यका लागि निर्वाचन हुने छ । प्रदेशका १० जिल्लामध्ये सुर्खेत र दैलेखमा दुई÷दुई वटा प्रतिनिधि सभा निर्वाचन क्षेत्र छन् । सल्यान, रुकुम पश्चिम, जाजरकोट, डोल्पा, जुम्ला, हुम्ला, मुगु र कालीकोटमा एक÷एक वटा प्रतिनिधि सभा निर्वाचन क्षेत्र रहेका छन् । आगामी निर्वाचनमा नेपाली नागरिकता प्राप्त गरेका र मतदाता नामावलीमा नाम दर्ता गराएका व्यक्ति २०८२ फागुन २० गतेसम्म १८ वर्ष पुगिसकेकाले मतदानमा सहभागी हुन पाउँछन् । यदि २० गतेपछि १८ बर्ष पुग्नेहरुले भने मतदानमा सहभागी हुन पाउँदैनन् ।
प्रधानमन्त्री सुशिला कार्की नेतृत्वको सरकराले आगामी फागुन २१ गते प्रतिनिधि सभाको निर्वाचन तोकेको छ । सरकारले भदौ २८ गते तत्कालिन प्रतिनिधि सभा विघटन गरी फागुन २१ मा निर्वाचन घोषणा गरेको हो । गत भदौ २३ र २४ गते भएको जेनजी आन्दोलनको दबावमा परि तत्कालिन प्रधानमन्त्री केपी शर्मा ओलीले राजीनामा दिएपछि जेनजी समूहकै सुझावका आधारमा पूर्वप्रधानन्यायाधिश सुशिला कार्कीको नेतृत्वमा सरकार गठन गरिएको थियो ।
तत्कालिन प्रधानमन्त्री ओली नेतृत्वको सरकारले सामाजिक सञ्जालमा लगाएको प्रतिबन्ध, व्याप्त भ्रष्टाचार लगायतको विरोधसहित देशभर आन्दोलन भएको थियो । भदौ २४ गते सडकमा उत्रिएको जेन–जी समूहको विद्रोहले नेकपा एमाले र नेपाली कांग्रेस लगायतका दल सम्मिलित ओली नेतृत्वको सरकार विघटन भएको थियो । एमाले अध्यक्षसमेत रहेका ओलीले राजिनामा दिएपछि जेन–जीहरुको मागबमोजिम संसद विघठन भएर कार्कीको नेतृत्वमा सरकार बनेको हो । उनी नेतृत्वको सरकारलाई ताजा जनादेशसहित प्रतिनिधि सभाको निर्वाचन गराउने म्याण्डेट छ ।
