आजदेखि स्थानीय र प्रदेश सरकारबीच भेला

आजदेखि कर्णाली प्रदेशका स्थानीय तहकाका प्रमुख तथा पदाधिकारीसहित भेला हुँदैछ । प्रदेश र स्थानीय तहबीचको सम्बन्धलाई थप व्यवस्थित र एकरुपता ल्याउन कर्णाली प्रदेश सरकारले प्रदेशभित्रका स्थानीय तहका प्रमुख, उपप्रमुखसहितको भेला आयोजना गरेको हो । मुख्यमन्त्री तथा मन्त्रिपरिषद्को कार्यालयको आयोजनामा आज र भोलि प्रदेश राजधानी वीरेन्द्रनगरमा भेला हुँदैछ । दुईदिने भेलामा नगरप्रमुख र उपप्रमुख, गाउँपालिकाका अध्यक्ष, उपाध्यक्ष, समन्वय समितिका प्रमुख तथा उपप्रमुख, सम्बन्धित पालिकाका प्रमुख प्रशासकीय अधिकृतहरुको सहभागिता रहनेछ ।
मुख्यमन्त्री तथा मन्त्रिपरिषदको कार्यालयका सचिव लक्ष्मीकुमार विकका अनुसार भेलामा ३ वटा मुख्य विषयमा छलफल हुनेछ । प्रदेश र स्थानीय तहबीचको अन्तरसम्बन्ध तथा सेवाप्रवाह, कर्णाली प्रदेश सरकारले योजना छनोटसम्बन्धी हाल गरिएको अभ्यास तथा योजना छनोट कार्यविधि, स्थानीय तहका कर्मचारी र राजस्व संकलन तथा बाडफाँडका विषयमा छलफल हुने उनले जानकारी दिए ।
संविधानमा उल्लेख गरिएका तीन तहका सरकारबीच सहकार्य, सहअस्तित्व र समन्वयको अवधारणामा अघि बढ्नुपर्ने भावनाअनुसार भेलाको आयोजना गरिएको उनले जानकारी दिए । छलफल तथा अन्तक्र्रियाले दुई तहका सरकारबीच देखिएका समस्या र समाधानका उपाय खोज्न मद्दत पुग्ने उनले बताए ।
कर्णाली प्रदेश सरकारले पहिलो पटक योजना छनोट तथा आयोजना बैंकको अवधारणा ल्याएर चालु आर्थिक बर्षको बजेट कार्यान्वयन गरिररहेको छ । कार्यक्रममा उक्त अवधारणालाई थप परिमार्जन गर्ने विषयमा पनि छलफल गरिनेछ ।