कर्णालीमा कुपोषणको चक्र बच्चा जन्मिएपछि मात्र सुरु हुँदैन। महिनावारी सुरु हुने उमेरदेखि नै किशोरीको खानामा लाग्ने बन्देजबाट यसको यात्रा सुरु हुन्छ । महिनामा ३–५ दिन दूध, दही, घिउ, मासु र फलफूलजस्ता पोषिला खानेकुराबाट वञ्चित हुने किशोरी वर्षमा ३६–६० दिनसम्म यस्तो प्रतिबन्धमा पर्न सक्छिन् । यही विभेद किशोरावस्थाबाट विवाह, गर्भधारण र मातृत्वसम्म पुग्दा पोषणको अभाव पनि पुस्तौँसम्म सर्छ । कर्णालीमा पाँच वर्षमुनिका ३६.६ प्रतिशत बालबालिका उमेरअनुसार होचा छन् र १५–४९ वर्षका २५.४ प्रतिशत महिलामा रक्तअल्पता देखिएको छ । महिनावारी हुँदा थालबाट हटाइएको पोषण गर्भावस्थामा कमजोर आमाको शरीर हुँदै बच्चाको कुपोषणसम्म पुग्ने यो जीवनचक्र कर्णालीमा निकै गहिरो छ । तर, बहस र उपचारभन्दा बाहिर छ ।