इजरायली सेनाले पश्चिमी इरानका मिसाइल प्रक्षेपण स्थलहरूमा सोमबार प्रहार गरेको बताएको छ । मध्यपूर्वका दुई मुलुक इरान र इजरायलबीच ११ दिनदेखि लडाइँ जारी छ ।

सेनाले विज्ञप्ति जारी गर्दै १५ वटाभन्दा बढी लडाकू विमानले पश्चिमी इरानको केरमानशाह क्षेत्रमा आक्रमण गरेको जनाएको छ । यस अघिको जानकारीमा इजरायली वायुसेनाले हाल इरानको केरमानशाहमा सैन्य पूर्वाधार स्थलहरूमा आक्रमण गरिरहेको बताएको थियो ।

इजरायलले जुन १३ मा इरानको क्षेप्यास्त्र र आणविक सुविधाहरूका साथै सैन्य अधिकारी र सुरक्षा सेवाहरूलाई लक्षित गरी ठूला आक्रमणहरू गरेको थियो ।

सोमबार दुई देशहरूबिच हवाई आक्रमण हुँदा तेहरानले सप्ताहान्तमा तीनवटा आणविक स्थलहरूमा अमेरिकी युद्ध विमानहरूले ‘बारूदी सुरूङ’ मा पुर्‍याएको क्षतिको बदला लिने प्रतिबद्धता गरेका छन् ।

अमेरिकी राष्ट्रपति डोनाल्ड ट्रम्पले उक्त आक्रमणले इरानको आणविक क्षमतालाई नष्ट गरेको बताउनु भएको छ भने अन्य अधिकारीहरूले तेहरानको आणविक कार्यक्रममा परेको असर निर्धारण गर्न ढिलो भएको बताएका छन् । रासस

माध्यमिक शिक्षा परीक्षा (एसईई) को नतिजा असारको तेस्रो सातासम्ममा सार्वजनिक गर्ने तयारी भएको छ । राष्ट्रिय परीक्षा बोर्ड अन्तर्गत परीक्षा नियन्त्रण कार्यालय कक्षा १० सानो ठिमीका परीक्षा नियन्त्रक डा. गणेशप्रसाद भट्टराईले एसईई परीक्षाको नतिजा प्रकाशनका लागि बिहानदेखि बेलुकासम्म तीव्र गतिमा काम भइरहेको बताए ।

असारको तेस्रो सातासम्ममा नतिजाको अपेक्षा गर्न सकिन्छ भन्दै परीक्षा नियन्त्रक डा. भट्टराईले यसै दिन भनेर भन्न सक्ने अवस्था अहिले नरहेको बताए ।

उत्तर पुस्तिका परीक्षण र सम्परीक्षणको काम सकिएर अहिले प्राप्ताङ्क इन्ट्री गर्ने काम भइरहेको भट्टराईले बताए ।

इन्ट्री लगायतका प्रोसेसिङको लागि ३५ दिन लाग्ने भए पनि त्यस अघि काम सम्पन्न गर्ने गरी तयारी भइरहेको र उत्तर पुस्तिका परीक्षण कार्यमा भएको ३२ दिनको ढिलाइलाई १० देखि १६ दिनमा झार्ने प्रयास गरिरहेको परीक्षा नियन्त्रक डा. भट्टराईले जानकारी दिए ।

यसका लागि डबल सिफ्टमा काम गरिरहेको कार्यालयले जनाएको छ ।

असार ६ गतेभित्रमा नतिजा सार्वजनिक गर्ने गरी कार्यतालिका बने पनि गत चैतमा शिक्षकहरूले गरेको सडक आन्दोलनका कारण नतिजा प्रकाशनमा असर परेको हो ।

गत वर्ष २०८१ सालको चैत २० गतेदेखि २०८२ वैशाख १७ गतेसम्म शिक्षकहरूले काठमाडौँमा सडक आन्दोलन गरेका थिए ।

बोर्डले ढिलोमा असारको चौथो हप्ताभित्र नतिजा प्रकाशन गर्ने लक्ष्य राखेको छ । गत २०८१ सालको चैत ७ गतेदेखि चैत १९ गतेसम्म सञ्चालन भएको एसईई परीक्षामा करिब ५ लाख १० हजार विद्यार्थी सहभागी भएका थिए ।

 जुम्ला जिल्लाको तातोपानी गाउँपालिका–७ जुम्लाकी ६३ वर्षीया महिलाको कर्णाली स्वास्थ्य विज्ञान प्रतिष्ठान शिक्षण अस्पताल जुम्लामा पाठेघर डिम्बाशयको सफल शल्यक्रिया भएको छ । पाठेघरको अण्डाशयमा ट्यूमर क्यान्सर भएको थियो ।

कर्णाली स्वास्थ्य विज्ञान प्रतिष्ठान शिक्षण अस्पताल जुम्लाका प्रसुति तथा स्त्रीरोग विशेषज्ञ चिकित्सकले पाठेघरको अण्डाशयमा ट्यूमर क्यान्सर भएको सफल शल्यक्रिया गरेका हुन् । प्रतिष्ठानका प्रसूति तथा स्त्रीरोग विशेषज्ञ चिकित्सक कविता साहका अनुसार ६३ वर्षीया महिलाको पाठेघरको डिम्बाशयमा ट्यूमर भएको थियो । पेटको जाँच, कडा, अनियमित, गतिहीन पिण्ड, प्रति योनी परीक्षण, पाठेघर स्पष्ट नभएको, गतिहीन, प्रतिबन्धित व्यभिचार, पाठेघरको दृश्यमान नभएको क्लिनिकल निष्कर्ष पश्चात शल्यक्रिया गरिएको हो ।

अनुसन्धानतर्फ सिईसिटी प्रतिवेदन, पेटको गुहामा डिम्बाशयको पिण्ड, सेरस वा म्युसिनस एडेनोकार्सिनोमाको शंका, ट्यूमर मार्करहरू, सिईए (कार्सिनोएम्ब्रियोनिक एन्टिजेन) उठेको (अन्य मार्करहरू निर्दिष्ट गरिएको छैन) स्त्रीरोग विशेषज्ञ डा. साहले बताइन् । व्यवस्थापनतर्फ शल्यक्रिया, कुल पेटको हिस्टेरेक्टमी द्विपक्षीय साल्पिङ्गो–ओफोरेक्टोमी, ओमेन्टेक्टोमी, एपेन्डेक्टोमी, डिबल्किंग सर्जरी गरिएको छ । उनले भनिन्, हिस्टोपाथोलोजीको लागि नमूना पठाइएको छ । रिपोर्टको प्रतिक्षामा छौँ । हेमोडायनामिकली स्थिर अवस्था रहेको छ । कर्णाली स्वास्थ्य विज्ञान प्रतिष्ठानका स्त्रीरोग तथा शल्यक्रिया टोली, एनेस्थेसिया टोली र हाम्रा सबै कर्मचारीको संयोजनले सफल शल्यक्रिया सम्पन्न भएको उनले जानकारी दिइन् ।

निश्चित निदान र थप व्यवस्थापनको लागि हिस्टोपाथोलोजी रिपोर्टको प्रतीक्षा गरिरहेका छौं उनले थपिन्, यदि घातकता पुष्टि भयो भने केमोथेरापी गर्नुपर्ने हुन्छ । बढेको सिईए सहित ठूलो डिम्बग्रन्थी द्रव्यमान (सम्भावित घातक), सफल शल्यक्रिया डिबल्किंग गरिएको हो । हिस्टोपाथोलोजीको लागि अन्तिम निदान पेन्डिङ छ । व्यवस्थापनमा बहु–अनुशासनात्मक टोली कार्य महत्वपूर्ण हुन्छ, उनले भनिन् । हिस्टोपाथोलोजी निष्कर्षहरूमा आधारित सहायक थेरापीको लागि फलो–अप आवश्यक रहेको स्त्रीरोग विशेषज्ञ डा. साहले बताइन् ।

 मुगु जिल्लाको छायाँनाथ रारा नगरपालिका १२ स्थित लुम्स गाउँमा करेन्ट लागेर १० वटा खच्चर मरेका छन् । आइतबार राति १० बजेतिर राष्ट्रिय विद्युत् प्रसारण लाइनको करेन्ट लागेर १० खच्चर मरेका हुन् ।

मुगु जिल्लाका सहायक प्रमुख जिल्ला अधिकारी विभाकर मिश्रले लुम्स गाउँका तीन किसानका १० खच्चर मरेको पुष्टि गरे । उनका अनुसार कर्णबहादुर मल्लका ४ वटा, जक्ति बडुवालका ३ र पृथ्वीबहादुर ऐडीको तीन वटा खच्चर मरेका हुन् । यसअघि शनिबार मात्रै त्यही स्थानमा करेन्ट लागेर एक भैंसी मरेको थियो । राष्ट्रिय प्रसारण लाइनको ट्रान्समिटर राखेको स्थानमा पुग्दा एक्कासी खच्चरमा करेन्ट लागेको हो । सहायक प्रमुख जिल्ला अधिकारी मिश्रले करेन्टले खच्चर मरेको बताए । उनले भने, सदरमुकाम देखि ४५ मिनेटको दूरीमा पर्ने लुम्समा करेन्ट लागेर खच्चर मरेका हुन् । घटनास्थलमा प्रहरी टोली पुगिसकेको छ ।

छायाँनाथ रारा नगरपालिकाका प्रमुख विष्णुकुमार भामले विद्युत् प्राधिकरणको लापरबाहीका कारण किसानले खच्चर गुमाउनुपरेको बताए । बाटोमा ट्रान्समिटर राखिएको थियो उनले भने, करेन्ट लिक भयो । खच्चर मरे । विद्युत् प्राधिकरणका कर्मचारीलाई तत्काल घटनास्थलमा गएर मुचुल्का उठाउन भनिएको छ । नगरप्रमुख भामले थपे, तत्काल प्राविधिकहरु झिकाएर व्यवस्थित रुपमा सुरक्षित हिसाबले ट्रान्समिटर राख्न भनिएको छ । उनले किसानलाई विद्युत् प्राविधिकरणले नै क्षतिपूर्ति दिनुपर्ने बताए ।

अहिले पनि दुर्गम क्षेत्रमा खच्चरबाट दैनिक उपभोग्य सामानहरु लगायतका वस्तुहरु ढुवानी भइरहेका छन् । अहिले करेन्ट लागेर खच्चर मरेको आसपासमा जान रोक लगाइएको छ । स्थानीयले मरेका खच्चरको क्षतिपूर्ति दिन र विद्युत् सुरक्षित रुपमा जडान गर्न माग गरेका छन् ।