Blog

 सल्यानमा वर्षासँगै परेको चटयाङ लागेर सल्यानमा एक महिला घाइते भएकी छन् । घर नजिकै परेको चटयाङ लागेर त्रिवेणी गाउँपालिका–१ सागिने घर भएकी २४ वर्षकी आरती पुन घाइते भएकी हुन् ।

जिल्ला प्रहरी कार्यालय सल्यानका प्रहरी निरीक्षक रेशमबहादुर खत्रीका अनुसार घरमा बसिरहेका बेला चटयाङ परेको थियो । घाइते पुनलाई उपचारका लागि जिल्ला अस्पताल सल्यान ल्याइएको उनले बताए । यस्तै, कालिमाटी गाउँपालिका–५ दम्दवाली बस्ने पहलसिंह गाहाका चार बाख्रा चट्याङकै कारण मरेका छन् । दुई खसी र दुई बाख्रा मरेका हुन् ।

 गत मङ्गलबारदेखि अन्तर्राष्ट्रिय बजारमा सुनको मूल्य निरन्तर बढिरहेको छ ।

बिहीबारको तुलनामा स्थानीय बजारमा आज सुनको मूल्य तोलामा रु. चार हजार २०० ले वृद्धि भएको छ भने चाँदीमा रु. १५ ले बढोत्तरी भएको छ ।  नेपाल सुनचाँदी व्यवसायी महासङ्घका अनुसार आज एक तोला सुनको मोल रु. एक लाख ९७ हजार १०० कायम भएको छ भने एक तोला चाँदी रु. दुई हजार १६५ मा कारोबार भइरहेको छ ।

गत मङ्गलबार एक तोला सुन रु. एक लाख ९० हजार तथा सोही परिमाणको चाँदी रु. दुई हजार १६५ मा कारोबार भएको थियो ।  अन्तर्राष्ट्रिय बजारमा आज एक औँस सुन तीन हजार ४२७ अमेरिकी डलरमा कारोबार भइरहेको अन्तर्राष्ट्रिय सञ्चारमाध्यमहरूले जनाएका छन् ।

मुगुमा अविरल वर्षा संगै चट्याङ लागेर एकै किसानका १४ बाख्रा मरेका छन् ।

विहिबार दिउँसो चट्याङ लागेर छायाँनाथ रारा नगरपालिका वडा नं ८ झ्यारी गाउँका किसान देवचन्द्र रावलका १४ वटा बाख्रा मरेका हुन् । भने चार वटा बाख्रा घाईते भएका छन् । एकै साथ १४ बाख्रा मरेपछि देवचन्द्रले बाख्रा पालनबाट विस्तापित हुनु परेको छ । उनले नगरपालिका लगायत अन्य निकायबाट राहत पाए फेरि बाख्रा पालन गर्ने बताएका छन्। तीन घण्टा लामो भएको भारी वर्षापछि आएको बाढीले सोही गाउँकी बासुरुपा रावलको घर भत्कीएको छ । भने झ्यारी गाउँका अन्य धेरैजसो घरभित्रै बाढी(भल) पसेको छ । स्थानीय बासुरुपाका अनुसार भत्कीएपछि परिवारको विचल्ली भएको छ । भने गाउँले विस्तापित भएका छन् । एकै २०७९ असोज महिनाको २४ र २५ गते आएको अविरल वर्षाले झ्यारी गाउँमा ठूलो क्षति पुर्याएको थियो।

झ्यारी गाउँमा त्यहाँ माथि नजिकैको बाम्नेचौरमा बस्दै आएका स्थानीयभारी वर्षात हुन लागेसंगै चिन्तामा परेका छन् । २०७९ कै बाढीले चर्किएकै घरमा बस्नुपर्ने बाध्यता खेपीरहेका स्थानीय जोखिम मोलेर अहिले बस्न बाध्य रहेको स्थानीय असल रावलले बताएका छन् । वर्षापछिको बाढीले पाक्दै गरेको जौ गहुँ बालीमा पनि क्षति पुगेको छ । घटनाको एकिन विवरण आउन भने बाँकि रहेको छ । रारा छायानाँथ नगरपालिकाका मेयर विष्णु कुमार भामले प्रहरी पठाएर घटनाको मुचुल्का गर्न लगाएको बताए । क्षतिको विवरणनुसार किसानको राहत र पुर्नस्थापनाका लागि नगरपालिकाबाट उचित राहत प्रदान गरिने मेयर भामको भनाई छ ।

 जुम्लामा चालु आर्थिक वर्ष २ सय ३० जना किसानले गोठालो भत्ता पाएका छन् । कर्णाली प्रदेश सरकारले ५० भन्दा बढी भेडा पालेका किसानले प्रत्येक वर्ष भत्ता दिँदै आएको छ ।

पशु अस्पताल तथा पशु सेवा कार्यालय जुम्लाले भेडा पालन व्यवसायमा संलग्न किसानहरूलाई राहत स्वरूप गोठालो भत्ता वितरण गर्ने कार्य गरिरहेको छ । यो वर्ष सबै भन्दा बढी ४० जना गुठीचौर गाउँपालिकाका किसानले गोठालो भत्ता पाएका छन् । यसै गरी, सिँजाका ३७, तातोपानीका ३१, तिलाका २२, चन्दननाथ नगरपालिका १९, कनकासुन्दरीका १३ र हिमा गाउँपालिकाका ५ जना किसानले गोठालो भत्ता पाएको कार्यालय प्रमुख ज्ञानेन्द्रसिंह बुढथापाले बताए । उनले प्रक्रियामा आएका किसानलाई एक मुष्ट १८ हजार रुपियाँ दिइएको बताए । यो भत्ता भेडा पालनमा लागि परेका किसानहरूको प्रोत्साहनका लागि उपलब्ध गराइएको हो । तर, उपलब्ध तथ्याङ्क अनुसार कतिपय भेडापालक किसानहरू भने यो सुविधाबाट वञ्चित हुँदै आएका बताएका छन् ।

प्रक्रिया पुरा गरे पनि नाम नपरेको, आवेदन प्रक्रियाको जानकारी नहुनु वा आवश्यक कागजात अभाव जस्ता कारणहरूले गर्दा केही किसानहरूले गोठालो भत्ता प्राप्त गर्न सकेका छैनन् । स्थानीय स्तरमा यस विषयमा गुनासो बढ्दै गएको छ । प्रभावित किसानहरूले वितरण प्रक्रिया पारदर्शी र समावेशी हुनुपर्ने माग गर्दै आएका छन् । उनीहरूको भनाइ अनुसार, हामी पनि भेडा पाल्छौँ, सबै प्रक्रिया पूरा गरेका थियौँ, तर भत्ता पाएनौँ । पशु सेवा कार्यालयका प्रमुख बुढाथापाका अनुसार, भत्ता वितरण निश्चित मापदण्ड अनुसार हुने गर्छ । केही किसानहरूको विवरण अधुरो वा ढिला पुगेको हुन सक्छ, जसका कारण उनीहरू सूचीमा पर्न नसकेका हुन् । भत्ताबाट लाभान्वित भएका किसानहरूले पशुपालनमा थप उत्साह र स्थायित्व महसुस गरिरहेको बताएका छन् । यो अवस्थाले स्थानीय स्तरमा वितरण प्रणालीको पुनरावलोकन र आवश्यक सुधारको माग उठेको छ । यद्यपि, ग्रामीण तथा दुर्गम बस्तीका किसानहरू भने यो कार्यक्रमबाट वञ्चित भइरहेका छन् ।

सूचना अभाव, कमजोर पहुँच, प्रशासनिक झन्झट तथा आवश्यक कागजात सङ्कलनको कठिनाइका कारण ग्रामीण किसानहरू यो योजनाबाट लाभ लिन नसकेको बताइएको छ । स्थानीय किसानहरू भन्छन्, हामी भेडा पाल्छौँ, तर गोठालो भत्ता के हो भन्ने नै थाहा छैन । जानकारी नै पाएका छैनौँ । यसरी योजनाबाट वास्तविक हकदार किसान छुटिरहनु गोठालो भत्ता कार्यक्रमको प्रभावकारिता र पहुँच माथि प्रश्न उठाउन थालिएको छ । यस समस्यालाई सम्बोधन गर्न सरोकारवाला निकायहरूले सूचना प्रवाहमा सुधार, स्थानमै सेवा विस्तार र समावेशी वितरण प्रक्रिया अपनाउनु आवश्यक देखिन्छ ।

 रुकुम पश्चिमको मुसिकोट नगरपालिका–३ छेरामा मिनिट्रक र मोटरसाइकल ठोकिँदा दुई जना घाइते भएका छन् ।

शुक्रबार बिहान मुसीकोट नगरपालिका–४ को सोलाबाङबाट माछिमीतर्फ जाँदै गरेको रा ५ प ७० नम्बरको मोटरसाइकल सानीभेरीको सिम्लीबाट दाङतर्फ जाँदै गरेको रा १ ख १४९३ नम्बरको मिनिट्रकमा ठोक्किएको हो । दुर्घटनाको खबर लगत्तै घटनास्थल पुग्नुभएका त्रि सिद्धेश्वरी राप्ती यातायात समितिका रुकुम इन्चार्ज टेकबहादुर बिकले दुर्घटनामा परेर मोटरसाइकलमा सवार दुईजना घाइते भएको जानकारी दिए । घाइते हुनेहरुमा रुकुमपश्चिमको त्रिवेणी गाउँपालिका ७ निवासी टीकाराम केसी र भीमप्रकाश डाँगी रहेको इन्चार्ज बिकले बताए ।

घाइतेहरूलाई प्रहरी चौकी सोलाबाङका इन्चार्ज गणेश बिक, स्थानीयलगायतका टोलीले उद्धार गरेर जिल्ला अस्पताल सल्लेमा ल्याइएको छ । दुवैजना घाइतेलाई जिल्ला अस्पतालमा प्राथमिक उपचारपछि थप उपचारका लागि नेपालगञ्ज रिफर गरिएको छ । ट्रक चालक सल्यानका निर्मल बिक फरार रहेको र उनको खोजी भइरहेको प्रहरीले जनाएको छ । ट्रक भने प्रहरीले नियन्त्रणमा लिएको जनाएको छ ।