भारतीय क्रिकेट टिमको हेड कोचका लागि झन्डै ३ हजारभन्दा बढी आवेदन परेको छ। भारतीय क्रिकेट कन्ट्रोल बोर्ड (बीसीसीआई) का अनुसार हालसम्म टिम इन्डियाको हेड कोचका लागि ३ हजार ४ सय आवेदन परेका छन्। जसमा देशका प्रमुख हस्तीहरूको पनि नाम समावेश छन्।
सोमवार कोचका लागि आवेदन दिने अन्तिम समय थियो। बोर्डले आवेदन दिनेमा नरेन्द्र मोदी, अमित शाह, विरेन्द्र सहवाग, शाहरुख खान, सचिन तेन्दुल्कर, एमएस धोनीसहित विभिन्न चर्चित नामबाट आवेदन परेको बताएको छ। तर, बोर्डले ती आवेदन नक्कली भएको पनि बताएको छ।
बीसीसीआईले भारतीय पुरुष क्रिकेट टिमको मुख्य कोचका लागि आवेदन माग गरेको थियो। र, अब छनौट प्रक्रिया पनि अघि बढाइसकेको छ। बोर्डले कोचका लागि परेको नक्कली आवेदन नयाँ विषय नभएको भन्दै यसअघि पनि यस्ता नक्कली आवेदन पर्ने गरेको बताएको हो।
बोर्डले नियुक्त गर्ने नयाँ कोचले सन् २०२४ को जुलाई १ बाट २०२७ को डिसेम्बरसम्म कार्यभार सम्हाल्ने छन्।
बोर्डका अनुसार प्रमुख कोच हुनका लागि कन्तिमा ३० टेस्ट म्याच वा ५० वन डे म्याच खेलेको हुनुपर्ने छ।
हाल भारतीय पुरुष क्रिकेट टीमका प्रमुख कोच राहुल द्रविड रहेका छन्।
Leave a Reply