गणतन्त्र दिवसको दिन नेपाली कांग्रेसको रौतहट क्षेत्र नम्बर दुई क्षेत्रीय समितिले अदालतको फैसलाप्रति चित्त नबुझेको भन्दै जनसभाको आयोजना गरी सार्वजनिक रुपमा असन्तुष्टि जनाएको छ।
रौतहटको राजपुर नगरपालिकामा आयोजित वृहत् जनसभाका वक्ताहरुले महम्मद आफताब आलमको मुद्दामा अदालतले सुनाएको फैसलाविरुद्ध सार्वजनिक रुपमा आक्रोश पोखेका हुन्।
नेपाली कांग्रेसका नेता एवं तत्कालीन सांसद मोहम्मद आफताव आलमलाई राजपुर बम बिस्फोट मुद्दामा आरोपी बनाएर सजाय तोक्न कुनै प्रमाण नहुँदासमेत जन्मकैदको फैसला आएको वक्ताहरुको आरोप छ।
नेपाली कांग्रेस क्षेत्र नम्बर दुईका क्षेत्रीय सभापति शेख फैजुल्लाहले हस्ताक्षर गरी बोलाएको जनसभामा जिल्ला उपसभापति रामलोचन, सचिव रामचन्द्र गिरी लगायत जिल्ला कमिटी सदस्यहरुले नेता आलमप्रति अन्याय भएको भन्दै विरोध जनाएका थिए।
कार्यक्रमको प्रमुख अतिथि आलमका छोरा डा. फिर्दोष आलमले नेपाली जनताको लागि समर्पित रहेको आफ्नो परिवार हरेक समयमा निकै सङ्घर्ष गर्दै आएको बताउँदै पहिलो संविधान सभाको समयमा भए नभएको घटनाको दोषी ठहर हुने कुनै सामान्य प्रमाणसमेत नरहेको अवस्थामा विभिन्न जालझेल गरेर सजाय सुनाउनुले सर्वसाधारणमा अदालत प्रतिको विश्वास गुम्दै गएको जिकिर गरे।
पूर्वमन्त्री आलम अहिले नख्खु जेलमा कैदी बन्दी सरह जीवनयापन गर्न बाध्य रहेको बताउँदै डा. आलमले विना प्रमाण जन्मकैदको फैसला दिनुले सम्पूर्ण शक्तिहरू एक जुट भएर लागिपरेको आरोप लगाएका छन्।
नेपाली कांग्रेसका सचिव रामचन्द्र गिरीले पूर्व मन्त्री आलमसहितका व्यक्तिलाई विना प्रमाण मुद्दा चलाएर कारागार चलान गरिएकोमा आम जनतालाई जानकारी दिने र रिहाइका लागि दबाब सिर्जना गर्ने उद्देश्यले वृहत् जनसभाको आयोजना गरिएको बताए।
पूर्व मन्त्री आलम निर्दोष रहेको र बाहिरी योजना अनुसार देशीविदेशी शक्तिको दबाबमा कारागारमा राखिएको दाबी गर्दै सचिव गिरीले बिना प्रमाण आलम विरुद्ध गरिएको अन्यायपूर्ण फैसलालाई पुनर्विचार गर्नुपर्ने जिकिर गरेका छन्।
क्षेत्रीय सभापति शेख फैजुल्लाहको सभापतिमा सम्पन्न भएको जनसभालाई तरुण दलका जिल्ला अध्यक्ष एवं केन्द्रीय सदस्य नौसाद आलमले संचालन गरेका थिए।
Leave a Reply