भूकम्प पछिको पुर्ननिर्माणका लागि २१ अर्ब ६० करोड

संघीय सरकारले जाजरकोटको बारेकोट गाउँपालिकाको रामीडाँडा केन्द्रविन्दू भएर गएको भूकम्प पछिको पुर्ननिर्माणका लागि २१ अर्ब ६० करोड रुपैयाँ छुट्याएको छ।

अर्थमन्त्री वर्षमान पुनले मंगलबार संसदमा बजेट प्रस्तुत गर्दै जाजरकोट, रुकुम पश्चिमलगायतका जिल्लामा भूकम्पले क्षति भएका व्यक्तिका घर निर्माणका लागि उक्त रकम छुट्याइएको बताए।

‘जाजरकोट र रुकुम पश्चिमलगायतका जिल्लामा गएको भूकम्पबाट क्षतिग्रस्त निजी घरको सर्वेक्षण सम्पन्न गरेर पुननिर्माणलाई तिब्रता दिइनेछ,’ बजेट भाषणमा उनले भने, ‘भूकम्पपछिको पुननिर्माणका लागि २१ अर्ब ६० करोड रुपैयाँ छुट्याइएको छ।’

यस्तै सरकारले कर्णाली र मधेश प्रदेशको पूर्वाधार विकासका लागि १ अर्ब ५० करोड रुपैयाँ छुट्याएको छ। राष्ट्रिय गौरवको भेरी–बबई डाइभर्सन बहुउद्देश्यीय आयोजनाको हेडर्वक्स र विद्युत गृहको निर्माण गर्न २ अर्ब विनियोजन गरिएको बजेटमा उल्लेख छ। बजेट भाषणमा कर्णालीका १० वटै जिल्लामा सञ्चालन हुने गरेर एकीकृत कर्णाली सिंचाई विकास आयोजनाका लागि ८२ करोड विनियोजन गरिएको छ।

सरकारले आगामी मंसिर महिनामा सञ्चालन हुने दशौं राष्ट्रिय खेलकुद प्रतियोगीताका लागि ६० करोड रुपैयाँ छुट्याएको छ। दशौं राष्ट्रिय प्रतियोगीता कर्णाली प्रदेशको राजधानी वीरेन्द्रनगरमा हुँदैछ। यस्तै सरकारले सल्यान र रुकुमको शारदा नदी आसपासको क्षेत्रलाई कृषि करिडोर र जुम्लाको हिमा नदी र तीला नदी आसपासको क्षेत्रलाई मार्सी धान करिडोरका रुपमा विकास गर्ने गरेर बजेट विनियोजन गरेको जनाएको छ।

सरकारले आगामी आर्थिक वर्षमा कर्णाली करिडोरमा पाँच वटा पुल र ५० किलोमिटर सडकको स्तरोन्नति गर्ने जनाएको छ। यस्तै रत्न राजमार्ग र कर्णाली राजमार्गको स्तरोन्नति गर्नुका साथै सुर्खेतको भेरीगंगा उपत्यकालाई पहाडी क्षेत्रको आधुनिक शहर बनाउन गुरुयोजना तर्जुमा गर्ने नीति सरकारले लिएको छ।

सरकारले डोल्पाको धो, हुम्लाको लिमी उपत्यकालाई नमुना बस्ती निर्माण गरेर पर्यटकीय केन्द्रको रुपमा विकास गर्नुका साथै कर्णालीलाई जडिबुटी केन्द्रको रुपमा विकास गर्ने जनाएको छ। यस्तै वन पैदावारमा आधारित समृद्ध कर्णाली उद्यमशीलता कार्यक्रम सञ्चालन गरिने बजेटमा उल्लेख छ।

साविकका कर्णालीका हुम्ला, जुम्ला, मुगु, डोल्पा र कालिकोट जिल्लामा विद्यार्थीहरुका लागि दिइँदै आएको दिवा खाजा रकम बृद्धि गरिएको छ। सुर्खेतको वीरेन्द्रनगरमा रहेको कर्णाली प्रदेश अस्पताललाई पाँच सय शैयाको बनाउने बजेट भाषणमा उल्लेख छ।