मोरङमा २ सय ७१ किलो गाँजा बरामद

भारतसँग सीमा जोडिएको मोरङका छुट्टाछुट्टै स्थानबाट सशस्त्र प्रहरी नेपालले ठूलो परिमाणमा लागुऔषध गाँजा बरामद गरेको छ।

विराटनगरको इलाका प्रहरी कार्यालय रानीबाट खटिएको टोलीको टोलीले मंगलबार राति साढे ११ बजेतिर विराटनगर– १४ जतुवाबाट १ सय ८१ किलोग्राम गाँजा बरामद गरेको हो।

इलाका प्रहरी रानीका प्रमुख प्रहरी निरीक्षक प्रकाश थापा नेतृत्वको टोलीले प्रदेश १–०२–००१ ख (२७) नम्बरको मिनी ट्रकबाट गाँजा बरामद गरेको मोरङ प्रहरी प्रमुख एसपी नवराज कार्कीले जानकारी दिए।

खाली सिलिन्डर लोड गरी कच्ची सडकको साइडमा रोकेर राखेको ट्रकलाई शंका लागी खानतलासी गर्दा गाँजा फेला परेको बताउँदै, एसपी कार्कीले भने, ‘ट्रकको पछाडि सामान राख्ने ठाउँमा बोरामा प्याक गरी माथिबाट कुचोले छोपेर राखिएको अवस्थामा गाँजा भेटिएको हो। गाँजासहित ट्रक र चालकलाई पनि नियन्त्रणमा लिइएको छ ।’

पक्राउ परेका मिनी ट्रकका चालक संखुवासभाको चैनपुर नगरपालिका– १ का २७ वर्षीय लाक्पा दोर्जे शेर्पाविरुद्ध लागुऔषध ऐनअन्तर्गतको मुद्दा चलाउने प्रहरीले जनाएको छ।

त्यस्तै, सशस्त्र प्रहरीले जहदा– १ मुसहरी टोलबाट मंगलबार साँझ ९० किलो गाँजा बरामद गरेको छ। मकै बारीमा लुकाएर राखेको सूचनाका आधारमा बिओपी (बोर्डर आउट पोस्ट) मधुमल्लाबाट खटिएको सइ लोकबहादुर बस्नेत नेतृत्वको टोलीले सीमा क्षेत्र नजिकबाट मंगलबार साँझमा गाँजा बरामद गरेको हो।

गाँजा कसले ल्याई लुकाए राखेको खुल्न नसकेको र गाँजाको धन्दामा संलग्नको खोजी भइरहेको सशस्त्र प्रहरी बल मोरङका प्रमुख एसपी विश्व खड्काले बताए। बरामद भएको गाँजा आवश्यक अनुसन्धान र कारबाहीका लागि नेपाल प्रहरीको जिम्मा लगाइएको छ।