बैंककमा लगानी प्रवर्द्धन गर्न नेपालीको सक्रियता

थाइल्यान्डको राजधानी बैंककस्थित नेपाली दूतावासले मुलुकको पर्यटन, व्यापार तथा लगानी प्रवर्द्धनका निम्ति थाई उद्यमीहरूको उपस्थितिमा प्रवर्द्धनात्मक कार्यक्रम आयोजना गरेको छ।

बुधबार आयोजित उक्त कार्यक्रममा खासगरी नेपाल तथा थाइल्यान्डका जडीबुटी उत्पादक, प्रशोधन तथा निर्यातक, जैविक कृषि उत्पादक, कृषि तथा खाद्य प्रशोधन कम्पनी, थाइल्यान्डमा रहेर व्यवसाय गर्दै आएका नेपाली मूलका थाई नागरिक, गैरआवासीय नेपाली संघ, थाई नेपाली संघ, नेपाल वायु सेवा निगमका प्रतिनिधि एवं स्थानीय सञ्चारकर्मीको सहभागिता थियो।

कार्यक्रममा थाइल्यान्डका लागि नेपाली राजदूत धनबहादुर वलीले जडीबुटी तथा कृषि प्रशोधनलगायत क्षेत्रमा लगानी र प्रविधिका माध्यमबाट नेपाल र थाइल्यान्डबीच उत्पादन शृंखलाको विकास र संयुक्त बजार विस्तारमा ठूलो सम्भावना रहेको बताए।

दूतावासका अनुसार राजदूत वलीले प्राप्त अवसरलाई कार्यस्तरमा विकास गर्न दुई देशका व्यवसायीबीच निरन्तर छलफल आवश्यक भएकोमा जोड दिए। साथै उनले लगानी प्रवर्द्धनका कार्यमा व्यवसायीलाई सहयोग गर्न दूतावास सधैं तत्पर रहेको जानकारी दिए।

नेपाल जडीबुटी उत्पादक तथा प्रशोधन कम्पनी लिमिटेडका महाप्रबन्धक संगीता यादव र नेपाल निर्यातक महासंघका अध्यक्ष पवन गोल्यानले नेपालमा जडीबुटीको उत्पादन-प्रशोधन, कृषि उत्पादन तथा प्रशोधनका प्रशस्त सम्भावना रहेका जानकारी दिँदै नेपालमा लगानी गर्न थाई उद्यमीलाई अनुरोध गरेका थिए। –रासस