नेपाली चलचित्र ‘दान्भी’ को ट्रेलर सार्वजनिक भएको छ।
बिहीबार काठमाडौंमा एक कार्यक्रमबीच ट्रेलर सार्वजनिक भएको हो। अभिनेत्री पूजा शर्माले एक्सन भूमिका निर्वाह गरेको चलचित्रमा कुन्साङ बोन्जनको शीर्ष भूमिका रहेको छ।
फिल्मलाई रूपेश तामाङले निर्देशन गरेका हुन भने देव मगर र अनुप गडाल निर्माता छन्। फिल्ममा रविना थापा मगरको कथा, संजोग कुँवर रानाको पटकथा तथा संवाद, श्री श्रेष्ठको द्वन्द्व, हरिबहादुर घलेको छायाँकन र बन्द्रे प्रसादको सम्पादन छ।
ट्रेलर सार्वजनिक कार्यक्रममा बोल्दै अभिनेत्री शर्माले सुटिङको भिडियो हेर्दा अहिले पनि हात काँप्ने बताइन्। उनले बाइक चलाएर मात्रै एक्सन हुन्छ भन्नेजस्ता शीर्षकमा समाचार सम्प्रेषण भइरहेकोप्रति आपत्ति जनाउँदै उनले चलचित्र हेरिसकेपछि मन लागेको शीर्षक राख्न तर एउटा मात्रै क्लिप हेरेर शीर्षक नराखिदिन आग्रह गरिन्।
‘अहिले पनि फिल्मको सुटिङ कसरी गर्न सकेँ, कसरी गरेँ भनेर हात काँप्छ। अब मलाई गरायो भने म सक्दिनँ होला। त्यो मेहनत अहिले सम्झिदा डर लाग्छ। अब कामले नै देखाउँछु भनेर अघि बढेको छ। बाइक चलाएर एक्सन हुन्छ भन्ने शीर्षकमा समाचार लेख्नुभएको थियो, पूरा फिल्म हरेपछि थाहा हुन्छ, केके छ भनेर त्यस्तो शीर्षक नलेखिदिनुहोला।’
पूजाले दान्भीमा पहिलो पटक एक्सन भूमिका निर्वाह गरेकी हुन्। चलचित्र आगामी असार ७ गतेदेखि प्रदर्शनमा आउँदै छ।
हेर्नुहोस् ट्रेलर :