हावाहुरीले कास्कीमा १४ घरमा क्षति

हावाहुरीले कास्कीमा १४ वटा घर तथा अन्य संरचनामा क्षति पुगेको छ। कास्की प्रहरीका अनुसार बिहीबार बेलुकीको हावाहुरीले कास्कीका विभिन्न गाउँमा क्षति पुर्‍याएको छ।

कास्की प्रहरीका अनुसार कास्कीको रुपा गाउँपालिकामा हावाहुरीले बढी क्षति गरेको छ। मानवीय क्षति भने नभएको प्रहरीको भनाई छ। प्रहरीका अनुसार रुपा गाउँपालिका–१ च्यार्पे बस्ने नरमाया गुरुङको दुई तले कच्ची घरको टिनको छानो हावाले उडाएको छ। छाना उडेपछि घरभित्र राखिएको अन्नपात लत्ताकपडा भिजेर क्षति भएको छ।

त्यस्तै रुपा–२ छापडाँडा बस्ने सोमबहादुर खड्काको घरको छानो उडाउँदा धनसारमा रहेको अन्नपात भिजेर नोक्सान भएको छ। रुपा–२ माझकोटका हर्कबहादुर गुरुङको घरको छाना पनि हावाले उडाएको छ।

त्यस्तै रुपा–६ जामुने बस्ने चिजामाया गुरुङको बाख्राको खोर र शौचालयको टिनको छाना पनि हावाले उडाएको छ। जामनेकै कसिला गुरुङको घरको छाना पनि उडाएको छ।

त्यही गाउँका प्रतिक अधिकारी, गंगा गुरुङ, राजकुमार तामाङ, अब्बस अलि मिया, अबदुल मिया, रजिना मिया, मैमुन मिया, लैलातान मिया, कृष्णबहादुर थापा, तसबिरन मिया, जानकी गुरुङको घरमा पनि हावाहुरीले क्षति गरेको छ। त्यस्तै स्थानीय मन्दीरमा पनि क्षति पुगेको प्रहरीको भनाई छ।