इलाम जिल्ला लीग: उपाधिको लागि रेडहर्स र त्रिवेणी भिड्ने

एन्फा इलाम जिल्ला लीगको उपाधिको लागि रेडहर्स फुटबल क्लब र त्रिवेणी फुटबल क्लब भिड्ने भएका छन्।

इलामको ठुलो टुँडिखेलमा भएको सेमिफाइनल खेलमा रेडहर्सले मिलियन फ्रेन्डर्स क्लब (एमएफसी) पान्दाम र त्रिवेणीले फ्रेन्डसिप यूथ क्लब गोदकलाई हराउँदै उपाधि होडमा प्रवेश गरेका हुन्।

पहिलो सेमिफाइनल खेलमा रेडहर्सले एमएफसीलाई टाइब्रेकरमा हराएको हो। निर्धारित समयमा दुवै टिमले १–१ गोलको बराबरी खेलेपछि निर्णयका लागि टाइब्रेकर रोजिएको थियो।

टाइब्रेकरमा रेडहर्स ४–२ गोल अन्तरले विजयी बन्यो। रेडहर्सलाई फाइनल पुर्‍याउन गोलरक्षक निशम दनुवारले निर्णायक भूमिका खेले। उनले एमएफसीको २ टाइब्रेकर प्रहार बचाएका थिए।

खेलको सुरुवाती अग्रता रेडहर्सले लिएको थियो। दोस्रो हाफको १४ औँ मिनेटमा प्रिन्स शेर्पाले हेडर मार्फत गोल गर्दै अग्रता दिलाए। इन्जुरी समयमा शुसान्त गुरुङले बराबरी गरे।

दोस्रो सेमिफाइनल खेलमा त्रिवेणीले फ्रेन्डसिप माथि ३–० गोल अन्तरको जित दर्ता गरेको छ। पहिलो हाफ गोलरहित बराबरी सकिएको खेलमा दोस्रो हाफको ११ औँ मिनेटमा अबिरल राईले त्रिवेणीलाई अग्रता दिलाए।

अन्तिम मिनेट र अतिरिक्त समयमा मुकेश मगरले गोल गरेपछि त्रिवेणीले रेडहर्ससँग उपाधि भेट पक्का गरेको हो। फाइनल खेल शनिबार हुनेछ।