आफ्नै बुबाको ‘हत्या’ गरेर फरार छोरा पक्राउ

आफ्नै बुबाको हत्या गरी फरार भनिएका व्यक्तिलाई प्रहरीले पक्रेको छ। इलामको माई नगरपालिका–१०, ढोडेनीका ३५ वर्षे रामबहादुर राई पक्राउ परेका हुन्।

जिल्ला प्रहरी कार्यालयका अनुसार जेठ १६ गते उनले आफ्नै बुबा ६६ वर्षे दिलबहादुर राईलाई चिर्पट प्रहार गरी हत्या गरेको आरोप छ।

चिर्पटले हिर्काएर बेहोस पारी जंगलको बाटो भई फरार रहेको खबर पाएपछि प्रहरीले उनको खोजी गरेको थियो।

जिल्ला प्रहरी कार्यालयका सूचना अधिकारी प्रकाश जबेगूले खोजीक्रममा उनी माई नगरपालिका–१० को ढोडेनी जंगलमा फेला परेको जानकारी दिए।

घटनाबारे थप अनुसन्धान भइरहेको प्रहरीले जनाएको छ।