रानीवनले छाड्यो रेलिगेसन जोन

बाजुराको रानीवन स्पोर्ट्स क्लबले सहिद स्मारक ‘सी’ डिभिजन लिगमा रेलिगेसन जोन छाडेको छ। शुक्रबार सातदोबाटोस्थित एन्फा कम्प्लेक्समा सम्पन्न खेलमा सातौं स्थानको मनोहरा युनाइटेड युथ क्लबलाई १–१ गोलको बराबरीमा रोक्दै रानीवन १२‍औं स्थानमा उक्लिएको हो।

१४ टोली सहभागी प्रतियोगितामा रानीवनले ११ खेलबाट एक जित र पाँच बराबरीसँगै आठ अंक जोडेको छ। रानीवनभन्दा तल स्वयम्भू क्लब र गोलबजार स्पोर्ट्स क्लब छन्।

मनोहराको भने ११ खेलबाट ४ जित र ३ बराबरीसँगै १५ अंक पुगेको छ। खेलको ३१औं मिनेटमा उत्तम शाहीले काउन्टर अट्याकमार्फत मिलाइदिएको बललाई सञ्जय श्रेष्ठले फिनिसिङ गर्दै मनोहरालाई सुरुआती अग्रता दिलाएका थिए।

उक्त अग्रता मनोहराले अन्तिम समयसम्म जोगाउन सकेन। दोस्रो हाफको इन्जुरी समयमा आविष्कार खड्काको खुट्टाबाट बल खोस्दै दोस्रो हाफमा मैदान प्रवेश गरेका युवराज राईले मनोहराको पोस्टनजिकै बल लगेका थिए। तर, फिनिसिङ टच दिने क्रममा मनोहराका सविन घिमिरेले उनलाई लडाएपछि रेफ्रीले पेनाल्टी दिएका थिए। उक्त पेनाल्टीलाई सन्दीपबहादुर सिंहले सदुपयोग गर्दै रानीवनलाई एक अंक दिलाए।

अर्को खेलमा गोलबजार स्पोर्ट्स क्लबले सानेपा क्लबलाई १–१ गोलको बराबरीमा रोक्यो। यससँगै ११ खेल खेलेको गोलबजार ७ अंक जोड्दै पुछारमा छ। समान खेलबाट १२ अंक जोड्दै सानेपा नवौं स्थानमा छ।

खेलको सातौं मिनेटमा नीराजनजंग शाहीले गोल गर्दै सानेपालाई सुरुआती अग्रता दिलाएका थिए। सौगात लामाले दिएको एअर बललाई कप्तान खेलराज तामाङले हेडिङ गर्दै गोलबजारका गोलरक्षक कुशल विश्वकर्मानजिक पुर्‍याएका थिए। तर, उक्त एअर बललाई कुशलले नियन्त्रणमा लिन सकेनन्। त्यही बललाई नियन्त्रणमा लिँदै दिएको पासमा नीराजनले हेडर गर्दै गोलमा परिणत गरे।

२८औं मिनेटमा गोलबजार खेलमा फर्कियो। जमिर दिन मियाले मिलाइदिएको क्विक पासलाई योन्जन हमालले नियन्त्रणमा लिइसकेका थिए। तर, सौगात लामाले योन्जनलाई लडाएपछि रेफ्रीले पेनाल्टी दिए। उक्त पेनाल्टीलाई सुजनकुमार पुलामीले सदुपयोग गरे।