महिला तथा पुरुष टी- २० क्रिकेट प्रतियोगिता : उपाधिका लागि भक्तपुर र काठमाडौं भिड्दै आज

महिला तथा पुरुष टी- २० क्रिकेट प्रतियोगिताको उपाधिका लागि भक्तपुर क्रिकेट सेन्टर र काठमाडौं क्रिकेट एक्सिलेन्ट सेन्टरबीच आज भिडन्त हुँदै छ। शुक्रबार सम्पन्न सेमिफाइनलमा भक्तपुर क्रिकेट सेन्टरले ग्रेट हिमालय क्रिकेट एकेडेमी र काठमाडौं क्रिकेट एक्सिलेन्ट सेन्टरले भक्तपुर क्रिकेट एक्सिलेन्ट सेन्टरलाई पराजित गरेकाे थियाे।

पहिलो सेमिफाइनलमा काठमाडौं क्रिकेट एक्सिलेन्ट सेन्टरले भक्तपुर क्रिकेट एक्सिलेन्ट सेन्टरलाई ८३ रनले पराजित गर्‍यो। काठमाडौं क्रिकेट एक्सिलेन्ट सेन्टरले दिएको १५६ रनको लक्ष्य पछ्याएको भक्तपुरले १७.४ ओभरमा सबै विकेट गुमाउँदै ८२ रन मात्रै बनाउन सक्यो। भक्तपुरका विवेक लामाले २९ बल खेल्दै सर्वाधिक २४ रन बनाए। विपिन आचार्य १६ र रोशन साउद १० रनमा आउट भए।

काठमाडौंका सोनु देवकोटाले १७ रन खर्चिंदै सर्वाधिक तीन विकेट लिए। दीपेन्द्र रावत र दयानन्द मण्डलको नाममा समान दुई विकेट रह्यो।

त्यसअघि पहिला ब्याटिङ गरेको काठमाडौंले ऋत गौतमको अविजित अर्धशतकसँगै निर्धारित २० ओभरमा तीन विकेट गुमाउँदै १५५ रन बनाएको थियो। ऋतले ५४ रन बनाउन ५४ बल नै खेले। समान बल खेलेका सुशान्त थापाले पनि ५४ रन नै बनाए। सोनु देवकोटा भने १५ रनमा आउट भए।

भक्तपुरका अविनाश बस्याल, विपिन न्यौपाने र किरण चन्दले समान एक विकेट लिए। खेलको प्लेअर अफ द म्याच ऋत गौतम भए। अर्को खेलमा अरूण ऐरीको अलराउन्ड प्रदर्शनमा भक्तपुर क्रिकेट सेन्टरले ग्रेट हिमालयलाई चार रनले पराजित गर्‍यो। भक्तपुरले दिएको १२४ रनको लक्ष्य पछ्याएको ग्रेट हिमालयले निर्धारित २० ओभरमा आठ विकेट गुमाउँदै ११९ रन मात्रै बनाउन सक्यो।

ग्रेट हिमालयका कृष कार्कीले १७ बल खेल्दै सर्वाधिक २१ रन बनाए। ईशान पाण्डे १८ र रूपेश श्रीवास्तव १५ रनमा आउट भए। भक्तपुरका अरूण ऐरी र नीतेश पटेलले समान दुई विकेट लिए। मुकेश ओझाको नाममा एक विकेट रह्यो।

त्यसअघि पहिला ब्याटिङ गरेको भक्तपुरले निर्धारित २० ओभरमा चार विकेट गुमाउँदै १२३ रन बनायो। भक्तपुरका दीपक बोहराले ३४ बल खेल्दै सर्वाधिक ५० रन बनाए।

अरूण ऐरी ३१ र विनोद तामाङ २१ रनमा पभेलियन फर्किए। ग्रेट हिमालयका कमल खत्रीले सर्वाधिक दुई विकेट लिए। रूपेश श्रीवास्तव र सन्दीप पराजुलीले समान एक विकेट लिए। खेलको प्लेअर अफ द म्याच अरूण भए।