दुई चरणमा जिल्ला फुटबल लिग सञ्चालन हुँदै

ताप्लेजुङमा दुई चरणमा फुटबलको जिल्ला लिग सञ्चालन हुने भएको छ। आयोजक जिल्ला फुटबल संघले शुक्रबार पत्रकार सम्मेलनमार्फत ‘ए’ र ‘बी’ डिभिजन लिग दुई चरणमा सञ्चालन गर्ने जनाएको छ।

जिल्ला फुटबल संघका अध्यक्ष अशोक चेम्जोङका अनुसार ‘बी’ डिभिजन नकाउट प्रतियोगिता जेठ १८ देखि २२ सम्म फुङलिङस्थित भानु जनमाविको खेल मैदानमा हुने छ।

‘ए’ डिभिजन लिग भने जेठ २१ देखि २५ गतेसम्म आठराई त्रिवेणी गाउँपालिकाको चाँगेस्थित चाँगे माविको खेल मैदानमा हुने भएको छ। ताप्लेजुङ जिल्ला फुटबल संघका महासचिव दिनेश खवासका अनुसार ताप्लेजुङ जिल्ला फुटबल संघका १४ वटा क्लब आबद्ध छन्।

तीमध्ये अहिलेसम्म ६ वटा ‘ए’ डिभिजनमा र ८ वटा ‘बि’डिभिजनका रहेका छन्। यो लिगमार्फत ‘ए’ डिभिजनको पुछारमा रहेका २ वटा क्लबलाई घटुवा गरी ‘बी’ डिभिजनमा सूचीकृत गरिने छ भने ‘बी’ डिभिजनको खेलका विजेता र उपविजेता टोलीलाई ‘ए’ डिभिजनमा बढुवा गरिने छ।

‘ए’डिभिजन लिगको विजेताले नगद ५० हजार र उपविजेताले नगद २५ हजार रूपैयाँ पुरस्कार पाउँदा ‘बी’ डिभिजनका विजेताले नगद ३० हजार उपविजेताले नगद १५ हजार रूपैयाँ पुरस्कार पाउने छन्।