यार्सा टिप्न गएका पाँचजनाको मृत्यु, पाँच सय बढीको उपचार

मुगुम कार्मारोङ गाउँपालिकाको पाटन क्षेत्रमा यार्सा टिप्न गएका पाँचजनाको लेक लागेर मृत्यु भएको छ। पाँच सय २६ जनाको औषधि उपचार भइरहेको मुगुम कार्मारोङ गाउँपालिकाले जनाएको छ।

लेक लागेर दुई दिनमा छायानाथ रारा नगरपालिकाका चारजनाको मृत्यु भएको हो। यस्तै दुई साताअघि जुम्लाको एक युवकको मृत्यु हुँदा हालसम्म पाँचजना यार्चा संकलकको ज्यान गएको गाउँपालिकाका जनस्वास्थ्य निरीक्षक बलीराज बुढाले बताए।

उनका अनुसार मृत्यु हुनेमा छायानाथ रारा नगरपालिका- १२ सोभा गाउँका २९ वर्षीय मुनबहादुर बुढा, वडा नम्बर १२ कम्फा गाउँका २१ वर्षीय सोबान बुढा, सोही वडाका २४ वर्षीय राजबहादुर सावत र वडा नम्बर १० का २० वर्षीय देवराज बुढाको यार्सा टिप्ने क्रममा लेक लागेर ज्यान गएको थियाे।

यसअघि जुम्लाको पातारासी गाउँपालिका ३ का अन्दाजी २६ वर्षीय सुर्ज रावतको मृत्यु भएको थियो। पाटनमा यार्सा टिप्न जाँदा लेक लागेर सिकिस्त बिरामी भई उपचारका निम्ति मुगु स्वास्थ्य चौकी, सिरानचौर र चितैकुना उपचार केन्द्रमा ल्याइएका ५ सय २६ जना बिरामीलाई औषधि उपचार गरेर निको पारी कोही पाटनतर्फ कोही घरतिर पठाइएको उनको भनाइ छ।

जनस्वास्थ्य निरीक्षक बुढाका अनुसार लेक लागेर बिरामी भएका ५ सय २६ जनामध्ये २ सय २३ महिला र ३ सय ३ पुरुष गरी जम्मा ५ सय २६ जनाको औषधि उपचार गरिएको छ।

कार्मारोङ गाउँपालिकाले मुगु, सिरानचौर चितैकुना लेक लाग्ने बिरामीको लागि स्वास्थ्यकर्मी र औषधि उपचारको व्यवस्था मिलाएको छ। समुद्री सतहदेखि करिब ४ हजार ५ सय मिटर उचाइदेखि ५ हजार ५ सय मिटर उचाइको क्षेत्रमा यार्सा टिप्ने गरिएको छ।