लाइसेन्स बनाइदिन्छु भन्दै ठगी गर्ने दुई पक्राउ

यातायात व्यवस्था कार्यालय रौतहटबाट सवारी चालक अनुमति पत्र (लाइसेन्स) बनाइदिन्छु भन्दै ठगी गर्ने दुई जनालाई प्रहरीले नियन्त्रणमा लिएको छ।

पक्राउ पर्नेमा चितवन भरतपुर महानगरपालिका-३ घर भई भरतपुर-१० मा सञ्चालनमा रहेको कान्तिपुर ड्राइभिङ स्कुल (सेन्टर) का संचालक ४५ वर्षीय रमेश पाठक र रौतहटको गौर नगरपालिका-१ का ४८ वर्षीय श्यामनाराय साह रहेका छन्।

जिल्ला प्रहरी कार्यालय रौतहटकी प्रवक्ता डिएसपी एलिजा गिरीका अनुसार उनीहरुले रौतहटको राजदेवी नगरपालिका-२ मा रहेको ट्रायल सेन्टरमा ट्रायल दिन जाने सेवाग्राहीहरूसँग ‘पैसा दिए पास गराइदिन्छु’ भनी ठगी गर्ने गरेका थिए।

ट्रायल भइरहेको समयमा केही सेवाग्राहीसँग रकम असुल गर्ने कार्य भइरहेको गुनासो आएपछि शङ्कास्पद अवस्थामा दुवै जनालाई नियन्त्रणमा लिइएको उनले जनाइन्।

दुवैले लाइसेन्स बनाइदिन्छु भनी प्रति व्यक्ति दश हजार देखि तिस हजार रुपैयाँसम्म असुल्ने गरेका थिए। उनीहरु माथि थप अनुसन्धान भइरहेको जिल्ला प्रहरी कार्यालय रौतहटले जनाएको छ।

पछिल्लो समय यातायात व्यवस्था कार्यालय गौरमा लाइसेन्स, नवीकरण तथा अन्य कागजपत्र मिलाउनु परेमा आधा दर्जनभन्दा बढी ‘दलाल’ हरू काम गराउन अगाडि सर्ने गरेको गुनासो सुनिँदै आएको छ।