दक्षिण अफ्रिकाविरुद्ध श्रीलंकाः प्रभाव पार्न सक्ने दुई खेलाडी

आइसिसी ट्वान्टी–२० विश्वकपअन्तर्गत चौथो खेलमा श्रीलंका र दक्षिण अफ्रिका भिड्दै छन्।

यो खेल नेपाली समय अनुसार सोमबार राति ८ः१५ बजे सुरु हुनेछ। टी २० विश्वकपको इतिहासमा दुई टोलीबीच कुल चार खेल भएका छन्।

उक्त खेलमध्ये तीनमा दक्षिण अफ्रिकी विजयी भएको छ। पछिल्लो तीन वर्षमायी दुई टोलीबीच चार ट्वान्टी–२० खेल भएका थिए। ती सबै खेल दक्षिण अफ्रिकाले जितेको छ।

वानिन्दु हसरंगा, श्रीलंका

एक दिवसीय विश्वकप र भर्खरै सम्पन्न इन्डियन प्रिमियर लिग (आईपीएल) खुट्टाको चोटका कारण गुमाएका श्रीलंकाका कप्तान वानिन्दु हसरंगा आइसिसी ट्वान्टी–२० विश्वकपमार्फत पुनरागमन गर्दैछन्। दक्षिण अफ्रिकाविरुद्धको खेलमार्फत अलराउन्डर हसरंगा सुखद् पुनरागमन गर्ने लक्ष्यमा रहेका छन्।

हसरंगाले आफ्नो करियर मुख्यतया बलरको रुपमा सुरु गरेका थिए। तर, पछिल्लो समय उनको ब्याटिङमा पनि निकै सुधार आएको छ। हसरंगाले पछिल्ला दुई वर्षमा श्रीलंका र लंका प्रिमियर लिगमा आफूलाई माथिल्लो स्तरमा प्रमोट गरेर आफ्नो ब्याटिङको क्षमता देखाएका छन्।

चौथोबाट सात नम्बरसम्म ब्याटिङ गर्ने क्षमता राख्ने हसरंगाको स्ट्राइक रेट १६० र औसत ३० भन्दा माथि छ। उनले ट्वान्टी–२० का ५५ इनिङ्समा २ अर्धशतकसहित ६५० रन बनाएका छन्।

यस विश्वकपमा श्रीलंका एक मात्र एक त्यस्तो टोली हो, जोसँग पावर हिटर छैनन्। तर, हसरंगाले स्पिनविरुद्ध ठूला सटहरू प्रहार गर्न सक्छन्। त्यसैले कप्तान र बलर हुनुका साथै उनी आफ्नो टोलीका लागि ब्याटिङमा पनि प्रभावकारी साबित हुन सक्छन्।

हसरंगाले श्रीलंकामा विश्वकपको तयारीस्वरुप आफ्नो दुई टोली बनाएर ट्वान्टी–२० अभ्यास खेल खेलेको थियो। उक्त अभ्यास खेलमा श्रीलंका क्रिकेट येल्लोका लागि उनले ९ र २८ रन बनाए। तर, बलिङ भने गरेनन्।

नेदरल्यान्ड्स र आयरल्यान्डसँगको अभ्यास खेलमा पनि उनले क्रमशः ३९ र २६ रन बनाए। आयरल्यान्डविरुद्धको खेलमा मात्रै बलिङ गरेका उनले चार ओभरमा ४० रन खर्चिएर दुई विकेट लिएका थिए।

क्विन्टन डि कक, दक्षिण अफ्रिका

दक्षिण अफ्रिका विकेटकिपर ब्याट्सम्यान क्विन्टन डि कक टोलीका विध्वंशकारी ब्याट्सम्यान मानिन्छन्। डी ककले ट्वान्टी–२० क्रिकेटका ८३ खेलमा २ हजार ३४१ रन बनाएका छन्।

गत वर्ष भारतमा भएको एक दिवसीय विश्वकपमा उनी सर्वाधिक रन बनाउने खेलाडीको सूचीमा तेस्रो नम्बरमा रहेका थिए। ११ इनिङ्स खेलेका उनले ५४.२७ को औषत र १२५.९५ को स्ट्राइक रेटमा ब्याटिङ गरेका थिए। उनले एक शतक र तीन अर्धशतकसहित ५९७ रन बनाएका थिए।

तर, आइपीएलमा भने उनी चल्न सकेनन्। लखनउ सुपर जायन्ट्सबाट खेलेका उनले ११ इनिङ्समा २२.७२ को औषत र १३४.४० को स्ट्राइक रेटमा तीन अर्धशकतसहित २५० रन मात्रै बनाएका थिए।

यसपटक भने दक्षिण अफ्रिका उनले पुरानो लय समात्नेमा आशवादी देखिन्छ।