नेपालको जितका लागि अमेरिकामा स्वस्तिशान्ति !

आइसिसी ट्वान्टी-२० विश्वकप क्रिकेटका लागि अमेरिकामा रहेका नेपाली क्रिकेट खेलाडीहरुको सम्मानमा नेपाली समाज टेक्ससले सोमबार बिहान टेक्ससको युलेस सिटीस्थित पशुपतिनाथ मन्दिर तथा बौद्ध विहारमा स्वागत कार्यक्रम आयोजना गरेको छ।

नेपालले मंगलबार नेदरल्यान्ड्ससँग खेल्दै विश्वकपको यात्रा सुरु गर्दै छ। स्वागत कार्यक्रममा प्रशिक्षक मोन्टी देसाई र कप्तान रोहितकुमार पौडेललगायत खेलाडीहरुको सहभागिता थियो।

तस्बिर: अनिल मल्ल ठकुरी/नागरिक

कार्यक्रममा नेपाली समाज टेक्ससका अध्यक्ष राजेन्द्र वाग्लेले खेलाडीलाई विजयको शुभकामना दिँदै नेपाली टिमले जित्ने विश्वास व्यक्त गरे।

सोही अवसरमा नेपाली सांस्कृतिक तथा आध्यात्मिक केन्द्रकी अध्यक्ष सीता सापकोटाले नेपालको नाम संसारभर चिनाउन खेलाडीहरुलाई शुभकामना व्यक्त गरिन्।

कार्यक्रममा युलेस सिटीका काउन्सिल मेम्बर टीका पौडेल, नेपाली जनसम्पर्क समितिका अध्यक्ष ज्ञानेन्द्र कार्कीलगायतले खेलाडीलाई शुभकामना दिएका थिए।

त्यसअघि प्रशिक्षक देसाईलगायत खेलाडीहरुले पशुपतिनाथ मन्दिरमा पूजा अर्चना गरेका थिए। मन्दिरका मुख्य पुजारी डा. शेखर पण्डित, मेघराज निरौलाले वेदको स्वस्ती वाचनबाट विजयको लागि शुभकामना व्यक्त गरेका थिए।

तस्बिर: अनिल मल्ल ठकुरी/नागरिक

प्रशिक्षक मोन्टी देसाई र कप्तान रोहितकुमार पौडेलले नेपालको विजयको लागी भगवानसँग आशीर्वाद लिएका थिए।

तस्बिर: अनिल मल्ल ठकुरी/नागरिक

खेलाडीहरूको सम्मानका नेपाली समुदायले पञ्चेबाजासमेत बजाएका थिए। कार्यक्रममा देसाईले सबैको आशीर्वादले नेपाली टिम उत्साहित रहेको उल्लेख गर्दै सम्मानका लागि धन्यवाद ज्ञापन गरेका थिए।