संसद बैठक बस्दै, यस्ता छन् आजको कार्यसूची

प्रतिनिधि सभाको बैठक आज पनि बस्दै छ। संसद भवन नयाँ बानेश्वरमा बस्ने बैठक बिहान ११ बजेका लागि बोलाइएको छ।

संसद सचिवालयका अनुसार आजको बैठकमा पनि आ.व.२०८१/०८२ को राजश्व र व्ययको वार्षिक अनुमानमाथिको सामान्य छलफल जारी रहने छ।

यस्तै आजको बैठकमा सभामुख देवराज घिमिरेले शोक प्रस्तावहरू प्रस्तुत गर्नेछन्।

नेपाली कांग्रेस पार्टीबाट २०६४ सालको संविधान सभामा ताप्लेजुङ्ग निर्वाचन क्षेत्र नम्बर १ बाट प्रत्यक्ष निर्वाचित र २०७० सालमा समानुपातिक निर्वाचन प्रणालीमार्फत् संविधान सभा सदस्यमा निर्वाचित सदस्य, पूर्व श्रम तथा रोजगार र स्थानीय विकास मन्त्री तथा लोकतान्त्रिक आन्दोलनहरूमा नेतृत्त्वदायी भूमिका निर्वाह गरेका सूर्यमान गुरुङको ८२ वर्षको उमेरमा गत वैशान २५ गते उपचारको क्रममा निधन भएकोमा आजको बैठकमा शोक प्रस्ताव प्रस्तुत हुनेछन्।

यस्तै, नेपाली कांग्रेसबाट २०४८ सालको प्रतिनिधि सभा सस्दय निर्वाचनमा बाँके निर्वाचन क्षेत्र नं. १ बाट निर्वाचित सदस्य तथा लोकतान्त्रिक आन्दोलनहरूमा नेतृत्त्वदायी भूमिका निर्वाह गरेका शैयद मेहराज अहमद शाहको ८५ वर्षको उमेरमा गत वैशाख २५ मा निधन भएको प्रति पनि सभामुखले शोक प्रस्ताव गर्ने छन् भने २०५८ मा नेपाली कांग्रेसबाट राष्ट्रिय सभा सदस्यमा निर्वाचित भएका साथै नेपालमा भएका हरेक लोकतान्त्रिक आन्दोलनहरूमा नेतृत्त्वदायी भूमिका निर्वाह गरेका खगेन्द्रराज रेग्मीको ७५ वर्षको उमेरमा गत जेठ १ मा निधन भएकोप्रति पनि शोक प्रस्ताव प्रस्तुत गर्ने कार्यक्रम रहेको छ।