खेलकुदलाई कसैले पनि बन्धक बनाएर राख्न पाइँदैन: खेलकुदमन्त्री

युवा तथा खेलकुदमन्त्री विराजभक्त श्रेष्ठले खेलकुद संघहरुलाई तत्काल क्यालेण्डर बनाएर काम गर्न निर्देशन दिएका छन्।

आइतबार काठमाडौंमा विभिन्न खेलकुद संघहरुको वार्षिक क्यालेण्डर सार्वजनिक कार्यक्रममा बोल्दै उनले यस्तो निर्देशन दिएका हुन्।

उनले वार्षिक क्यालेण्डर सार्वजनिक नगर्ने संघहरुलाई तत्काल क्यालेण्डर बनाएर सार्वजनिक गर्न र क्यालेण्डर नबनाए अप्रिय निर्णय लिन बाध्य हुने चेतावनी समेत दिए।

खेलकुद संघहरुले खेलहरु नै नगर्ने हो भने जनाइमा साँचो झुन्ड्याएझैँ झुन्डिरहन आवश्यक नरहेको उनकाे टिप्पणी थियाे। उनले खेलकुदलाई कुनै संघ बन्धक बनाएर राख्न नहुने बताए।

उनले भने ‘प्राविधिक समस्या पनि नभएको र जनाइको साँचो भिरेको जस्तो गरेर खेलकुदलाई कुनै संघ, कसैले पनि बन्धक बनाएर राख्न पाइँदैन। संघहरुले क्यालेण्डर ननिकालेको भए यथाशीघ्र बनाउनुस्। सार्वजनिक स्थानमा खेल हेर्दा सबै साथीहरू जिम्मेवार भएर हेरिदिनुस्।’

फरक प्रसङ्गमा मन्त्री श्रेष्ठले टुँडिखेलमा आज नेपाल र नेदरल्याण्डबीचको आइसिसी टि २० विश्वकप खेल देखाइने भएकाले सबैले जिम्मेवार भएर खेल हेर्न आग्रह गरे।