पेट्रोल खन्याएर आत्महत्याको प्रयास

विराटनगरका एक जना पुरुषले पेट्रोल खन्याएर आफ्नै शरीरमा आगो लगाएर आत्महत्याको प्रयास गरेका छन्।

शरीरमा आगो लगाएका विराटनगर महानगरपालिका–२ का ३९ वर्षीय पवनकुमार कामतको अवस्था गम्भीर रहेको मोरङ प्रहरीका प्रवक्ता डिएसपी ज्ञानेन्द्रबहादुर बस्नेतले जानकारी दिए।

उनका अनुसार मंगलबार साँझ पौन ८ बजेतिर विराटनगर–७ हरियाली टोलमा कामतले पेट्रोल खन्याएर आफैँलाई आगो लगाएका हुन्।

आगोले उनको शरीरको लगभग ७० प्रतिशत भाग जलेको बताउँदै, डिएसपी बस्नेतले भने, ‘घाइते कामतको विराटनगरस्थित कोशी अस्पतालमा उपचार भइरहेको छ। केही समयदेखि पारिवारिक तनावमा रहेको खुलेको छ।’

केही दिनअघि पत्नीसँग समेत सम्बन्ध विच्छेद गर्नु परेको पीडाका साथै पारिवारिक तनावका कारण आफैँलाई आगो लगाएको हुनुपर्छ। घटनाको थप अनुसन्धान अघि बढेको र अनुसन्धानपछि यथार्थ कुरा बाहिर आउने डिएसपी बस्नेतले बताए।