चाबहिलमा आगलागीबाट एकै परिवारका ५ घाइते

काठमाडौंकाे चाबहिलमा आगलागीबाट एकै परिवारका पाँच जना घाइते भएका छन्।

गए राति ९ बजे काठमाडौं महानगरपालिका वडा नम्बर-७ चाबहिलको एउटा घरमा आगलागी हुँदा पाँच जना घाइते भएका जिल्ला प्रहरी परिसर काठमाडौंले जनाएको छ।

घरको तेस्रो तलामा बस्दै आएका ५५ वर्षका चञ्चलबहादुर सिंहसहित श्रीमती र तीन छोरी घाइते भएका हुन्।छोरीहरूको उमेर २४ वर्ष, १६ वर्ष र ८ वर्ष रहेको छ।

चञ्चलबहादुर सिंहले अत्यधिक जाँड–रक्सी खाएर परिवारसँग झगडा गरी आगो लगाएको प्रारम्भिक अनुसन्धानमा खुलेको प्रहरीले जनाएको छ।

उनले जाँड–रक्सी खाएर झगडा गरी घटना घटाएको प्रारम्भिक निष्कर्ष छ। आगोबाट जलेका पाँचै जनाको कीर्तिपुरमा रहेको बर्न अस्पतालमा उपचार भइरहेको छ।

दुई जनाको अवस्था गम्भीर रहेको अस्पतालले जनाएको छ।