विद्यार्थीको धान, भिक्षुलाई दान

भक्तपुरको एभरेस्ट स्कुलमा कक्षा ५ मा अध्ययनरत छात्रा नेहासा प्रधानांग बुधबार विशेष खुसी देखिन्थिन्। उनको खुसीको कारण थियो- दान गर्न पाउनु। उनले भनिन्, ‘आफैंले दुःख गरेर फलाएको धान दान गर्न पाउँदा बडो खुसी महसुस हुँदोरहेछ।’

नेहासा आफूसहित स्कुलका छात्रछात्राले फलाएको धानको चामल भक्तपुर नगरपालिका- ७ स्थित मुनि विहार इनाचोमा रहेका भिक्षुहरूलाई दान दिन त्यहाँ पुगेकी थिइन्। छात्रछात्राले कृषि कर्म बुझ्नका लागि रोपेको धानबाट उत्पादित एक क्विन्टल चामल बुधबार कार्यक्रमबीच मुनि विहारका भिक्षुहरूका लागि दान दिएका हुन्।

विद्यार्थीले अघिल्लो असार १५ मा धान रोपेका थिए। मंसिरमा विद्यार्थीकै सक्रियतामा धान भित्र्याइएको थियो। त्यही धानको चामल उनीहरूले अहिले भिक्षुहरूलाई दान दिएका हुन्। उनीहरूले धान रोपेर चामल बनाउने काम कक्षा ४ मै गरेका थिए। चामल दान कक्षा ५ पढ्दा गरेका हुन्।

विद्यार्थीसँगै मुनि विहार पुगेकी शिक्षिका मञ्जु खड्काले विद्यार्थीले कक्षा ४ मा हुँदा रोपेको धानको चामल अहिले दान दिएको बताइन्। उनका अनुसार चामल दान गर्न विद्यार्थीका प्रतिनिधिका रूपमा कक्षाका क्याप्टेन र हाउस क्याप्टेनहरूलाई मात्रै ल्याइएको थियो। चामल हस्तान्तरण कार्यक्रममा स्कुलका चार छात्रा र चार छात्र, दुई शिक्षिका र दुई कर्मचारी उपस्थित थिए। उनीहरूले स्कुलको बसमा चामल राखेर मुनि विहार ल्याएका थिए।

स्कुलका प्रिन्सिपल भक्त राजभण्डारीले कृषि कर्म सिकाउन प्रत्येक वर्ष कक्षा ४ का विद्यार्थीलाई स्कुल नजिकैको खेतमा धानको बिउ राख्ने, रोप्ने थन्काउने र चामलसम्म बनाउन लगाउने गरेको बताए। उनका अनुसार दानको महत्व बुझाउन विद्यार्थीमार्फत नै भिक्षुहरूलाई चामल हस्तान्तरण गरिएको हो। कृषि कर्मका विविध पक्षमा विद्यार्थीलाई स्कुलले सहगोग गर्ने उनले बताए।

दानस्वरूप दिएको चामल बुझ्दै मुनि विहारका भिक्षु दीपक भन्तेले यो कार्यक्रमबाट विद्यार्थीमा सच्चरित्रको भावना विकास हुने विश्वास व्यक्त गरे। त्यस अवसरमा विद्यार्थीलाई चोरी ठगी नगर्नू, प्राणी हिंसा नगर्नु भन्नेलगायतका बुद्ध वचन पाठ गर्न दिइएको थियो।