Blog

विगत ४८ दिनदेखि चरणबद्ध आन्दोलनामा रहेका नेपाल धितोपत्र बोर्डका कर्मचारी र अर्थ मन्त्रालयबीच सहमति भएको छ । आइतबार मन्त्रालयमा बसेको बैठकले कात्तिक मसान्तभित्र कर्मचारीहरूको माग पूरा गर्ने सहमति भएसँगै आन्दोलनका कार्यक्रम फिर्ता लिएको नेपाल धितोपत्र बोर्ड कर्मचारी युनियनका अध्यक्ष अजय ढुंगानाले  जानकारी दिए ।
उनले भने, ‘हामीले राखेको माग कात्तिक मसान्तसम्म पूरा गर्ने सहमति भएसँगै काममा फर्किन तयार भएका हौँ । तथापि, सबै आन्दोलनका कार्यक्रम फिर्ता हुँदैनन् । ८–१० दिनको समयसम्म ‘पेन डाउन’ कार्यक्रम फिर्ता लिने तर बोर्डमा चलिरहेको निरन्तरको धर्ना कार्यक्रम भने जारी राखिनेछ ।’
कर्मचारीको सेवा सुविधा र बोर्डको स्वायतताको मुद्दालाई लिएर आन्दोलित भएका कर्मचारीहरूले यी माग पूरा नभएसम्म आन्दोलन जारी राख्ने बताएका छन् । आइतबार मन्त्रालयसँग कात्तिक मसान्तसम्ममा समस्याको समाधान गरिसक्ने सहमति भएको र यसलाई लिखित रूपमै गर्न लागिएको अध्यक्ष ढुंगानाले जानकारी दिए । यस लगत्तै धितोपत्र बोर्डका कर्मचारीहरू नियमित काममा फर्किने पनि उनले जानकारी दिए ।

जेन–जी मुभमेन्ट अलायन्सले काठमाडौं महानगरपालिकाले आइतबारदेखि सुकुम्बासी बस्ती खाली गराउने निर्णय गरेकोप्रति आपत्ति जनाउँदै उत्पीडित जनतामाथि दम्भ नदेखाउन आग्रह गरेको छ।
अलायन्सले जारी गरेको विज्ञप्तिमा स्थानीय सरकारले पर्याप्त अध्ययन र सहमतिबिना बस्ती हटाउने तयारी गरेकोमा चिन्ता व्यक्त गरेको छ। न्यायपूर्ण र सहमतिको व्यवस्थापन गर्न अलायन्सको अनुरोध छ।
‘सम्बन्धित समुदायसँगको सहमतिमा उपयुक्त व्यवस्थापन अपनाई सबैको साझा सहरको रूपमा काठमाडौं महानगरपालिकाले उदाहरण प्रस्तुत गरोस्। निहत्था, उत्पीडित जनताहरू माथि स्थानीय सरकारले दम्भ, तिरस्कार र बेवास्ताको अस्त्र नचलाओस्,’ विज्ञप्तिमा भनिएको छ।
त्यस्तै, अलायन्सले महानगर क्षेत्रभित्र रहेका बस्तीहरूबारे यथार्थ विवरण र तथ्यांक सार्वजनिक गर्न पनि आग्रह गरेको छ।
‘नक्कली र सक्कली सुकुम्बासी भनी विभिन्न बहसहरू हुने गरेको पनि पाइन्छ,’ विज्ञप्तिमा उल्लेख छ, ‘त्यसैले यदि अध्ययन गरिएको छ भने त्यसको प्रतिवेदन र तथ्यांक सार्वजनिक गर्नुपर्छ।’

जेन–जीलगायतले राजीनामाका लागि दबाब दिन थालेपछि गृहमन्त्री ओमप्रकाश अर्यालले आफ्नो धारणा सार्वजनिक गरेका छन् । गृहमन्त्री अर्यालले आज सामाजिक सञ्जालमार्फत शुद्ध चित्तले कर्म गर्नुको विकल्प नभएको प्रतिक्रिया दिएका छन् । उनले भनेका छन्, ‘गृह मन्त्रालय हरेक हिसाबले संवेदनशील मन्त्रालय हो । कतिपय विषयमा के गर्दैछौँ त भन्नै मिल्दैन, के गरौँसमेत भन्न नमिल्ने अवस्था हुन्छ । आफ्नो शुद्ध चित्तले कर्म गरिरहनेबाहेक हामीसँग अरु विकल्प हुँदैन ।’
उनले पाइलैपिच्छे सुशासनको बाटो हिँडेर देशलाई निर्वाचनमार्फत निकाससम्म डोरÞ्याउने सरकारको अभिभारालाई पूरा गर्ने प्रतिबद्धता व्यक्त गरे ।
जेन–जी आन्दोलनका अगुवा सुदन गुरुङले गृहमन्त्रीको कामप्रति असन्तुष्टि जनाउँदै राजीनामा मागेका छन् ।भने, काठमाडौं महानगरपालिकाका मेयर बालेन शाहका विश्वासपात्र भिक्टोर पौडेलले पनि केही दिनअघि गृहमन्त्री अर्याललाई हटाउन सामाजिक सञ्जालमा ट्रेन चलाउनुपर्ने तर्क सार्वजनिक गरेका थिए । जेन–जी आन्दोलनमा राज्यको तर्फबाट दमन भएकोमा तत्कालीन प्रधानमन्त्री केपी शर्मा ओली र गृहमन्त्री रमेश लेखककलाई पक्राउ गर्नुपर्ने उनीहरूको अडान छ ।

नेपाल प्रहरीको ट्र्याकसुट लगाएर हिँडेका व्यक्ति लुटपाटमा संलग्न भएको आरोपमा पक्राउ परेका छन्। भदौ २४ गते प्रहरी प्रभाग कपनमा लुटपाट गरेको ट्र्याकसुट लगाएर हिँडेको अवस्थामा प्रहरीले एक जनालाई पक्राउ गरेको हो।
प्रहरी वृत्त बौद्धबाट खटिएको टोलीले आइतबार बिहान ७ बजे २२ वर्षीय अमृत साउँदलाई फेला पारेका थिए। अछाम मल्लेक गाउँपालिका–७ घर भएका उनी काठमाडौंको कपनमा बस्दै आएका थिए। प्रहरीको ट्र्याकसुट लगाएर हिँडिरहेको अवस्थामा फेला परेपछि प्रहरी उनको डेरामा पुगेको हो।
डेरामा पुगेर तलासी लिँदा प्रहरी प्रभाग कपनबाट लुटिएका कम्प्युटर, सिपियू, प्रिन्टर, प्रहरीको रेनकोट, बुट र तरबार फेला परेको छ। प्रहरीले उनीमाथि थप अनुसन्धान अघि बढाएको छ।

मोटरसाइकल अनियन्त्रित भई दुर्घटना हुँदा एक जनाको मृत्यु भएको छ । मोटरसाइकलमा पछाडि सवार गुलरिया–७ का ३० वर्षीय विकास यादवको जिल्ला अस्पताल गुलरियामा उपचारका क्रममा मृत्यु भएको जिल्ला प्रहरी कार्यालय बर्दियाका सूचना अधिकारी डीएसपी देवेन्द्रकुमार मल्लले बताए ।
राजापुर नगरपालिका–१० स्थित जोगीपुर हुलाकी सडक खण्डमा राजापुर हुँदै गुलरियातर्फ आइरहेको लुप्र ०३००१ प ४१५७ नम्बरको मोटरसाइकल अनियन्त्रित भई दुर्घटना भएको हो ।
मोटरसाइकल चालक गुलरिया–७ का ३६ वर्षीय रामदत्त सोनीको अवस्था चिन्ताजनक भएकाले थप उपचारका लागि शिक्षण अस्पताल नेपालगन्ज रिफर गरिएकामा उक्त अस्पतालले यहाँ उपचार सम्भव नभएपछि लखनउ रिफर गरेको गुलरिया–७ का वडाध्यक्ष मनोजकुमार यादवले बताए ।

जिल्ला प्रहरी कार्यालय हुम्लाले एक सातामा ७५३ कार्टुन चिनियाँ मदिरा नियन्त्रणमा लिएको छ । चिनको ताक्लाकोबाट हिल्सा नाका भएर भित्रिएको चिनियाँ मदिरा प्रहरीले नियन्त्रणमा लिएको हो ।
यही महिनाको १९ गते जिल्ला प्रहरी कार्यालय हुम्लाको डिएसपी शंकर पोखरेलको नेतृत्वमा खटिएको टोलीले नाम्खा गाउँपालिकाका विभित्र स्थानबाट ३५१ कार्टुन र शुक्रबार बेलुका नाम्खा गाउँपालिका–३ को लामा खोल्सीबाट ४०२ कार्टुन गरी ७५३ कार्टुन नियन्त्रणमा लिएको जिल्ला प्रहरी कार्यालय हुम्लाले जनाएको छ ।
नियन्त्रणमा लिएको चिनियाँ मदिराको बजार मूल्य ३७ लाख ६ हजार ५०० रहेको जिल्ला प्रहरी कार्यालय हुम्लाका डिएसपी शंकर पोखरेलले बताए । ७५३ कार्टुनभित्र ९ हजार ३६ बोतल रहेको डिएसपी पोखरेलको भनाइ छ । विशेष सूचनाका आधारमा प्रहरीले जनप्रतिनिधि सुरक्षा, पत्रकारहरूको रोहबरमा छापा हानेको बताए ।

जुम्लाको सिँजा गाउँपालिकामा अधिकांश घरहरुका धारामा खानेपानी आउन थालेपछि स्थानीय उत्साहित भएका छन् । नदी, नाउला र खोलाबाट गाग्रीमा भरेर ल्याएको पानीले काम चलाउनुपर्ने सिँजाबासीले अहिले घरमै धारामा आउने पानी भर्न पाएका छन् । ‘घर–घरमा धारा पुगिसकेका छन्, अब धाराहरुको रेखदेख र संरक्षणको आवश्यकता छ, यो स्थानीयले आफैंले गर्नुपर्ने देखिन्छ ।’ सिँजा गाउँपालिका अध्यक्ष पूर्णप्रसाद धितालले भने ।
सिँजाको तथ्यांक अनुसार एक हजार ६४ घरमा खानेपानी धारा पुगेको छ । ‘स्थानीयले खानेपानीको अभावले दशकौंदेखि कठिन जीवन बिताइरहेका थिए,’ अध्यक्ष, ‘धितालले भने, ‘अब खानेपानीकै लागि समस्या भोगिरहनु पर्दैन ।’ सिँजाको मुख्य बजारदेखि दुर्गम भुलभुली सम्म, धितालिही देखि जोडु, भाडगाउँ सम्मका स्थानीय सुरक्षित खानेपानीको पहुँचमा पुगेका छन् । विद्यालय, स्वास्थ्यचौकी र हरेक सार्वजनिक स्थानमा खानेपानीका धारा राखिएका छन् ।
जसले पानीको प्यास मेट्न मात्रै नभइ स्वास्थ तथा सरसफाइका काममासमेट टेवा पु¥याएको छ । सिँजाका डिग्रा, जाँच गाउँका २१४, विष्टबाडा ८५, नराकोट १५२, फुंग्रमा ११९, गडापानीमा ४९४, धितालिहीमा ६४, फार्सेबाडामा १३०, गोरामा १८८, रुघागाउँमा ५४, जोडुमा ११०, चुलेलगाउँमा ८८, धापामा २७ र भुलीमा २२ धारा बनेका छन् ।
सिँजाले खानेपानी तथा सरसफाइलाइ प्राथमिकतामा राखेर काम गरेको छ । खानेपानीको क्षेत्रमा सुस्वा परियोजनाले साथ दिएको थियो । सुस्वा परियोजनाका प्रमुख मञ्जु थापाले खानेपानीका क्षेत्रमा कर्णाली प्रदेशको वीरेन्द्रनगरमा आयोजित मूल्यांकन कार्यक्रममा २८ स्थानीय तहमा सिँजा पहिलो स्थान ल्याउन सफल भएको प्रतिक्रिया दिए । सिँजाले खानेपानीको क्षेत्रमा कुल बजेटको २६ प्रतिशत बजेट लगानी गरेको छ । संघीय सरकारको अनुदान, फिनल्याण्ड सरकार र युरोपियन युनियनको सहकार्यमा सिँजाले खानेपानीका क्षेत्रमा काम गरेको थियो ।