नयाँ पार्टी गठन गर्ने तयारीमा जनार्दन, यी हुन् उनको पक्षमा उभिने नेताहरु

नेकपा माओवादी केन्द्रले दश पार्टीसँग एकता गरेर नेपाली कम्युनिस्ट पार्टी नामकरण गरेको छ । माओवादी केन्द्रका अध्यक्ष पुष्पकमल दाहाल प्रचण्डाको यही निर्णयमा अन्तरविरोध जनाउँदै अलग्गिएका जनार्दन शर्माले प्रगतिशील अभियान घोषणा गरेका छन् । माओवादीमा तत्कालीन उपमहासचिव जनार्दन शर्माले नयाँ पार्टी गठन गर्ने तयारी गरेका छन् ।
४० वर्ष पुष्पकमल दाहाल प्रचण्डको नेतृत्वमा रहेर पार्टीको काम गरेका शर्माले अन्तिममा पार्टी एकता प्रक्रियामा सहमति जनाएनन् । उनले गत आइतबार नै प्रचण्डसँग सम्बन्ध तोड्दै प्रगतिशिल नेपाल अभियान घोषणा गरेका थिए । उनको यो अभियानलाई सुरुमा साथ दिने नेताहरुमा माओवादीका तत्कालीन सचिव राम कार्की र स्थायी समिति सदस्य अञ्जना विशंखे थिए ।
यही १९ कात्तिकमा माओवादीको महाधिवेशन आयोजक समितिको अन्तिम बैठक काठमाडौंको प्रज्ञा भवनमा बसेको थियो । शर्मा र कार्कीले ललितपुरको बुखुण्डोलमा पत्रकार सम्मेलन गरेर अभियानको सुरुवात गरेका थिए । उनको अभियानमा सुरुको दिनमा साथ दिने कोही नभए पनि बिस्तारै उनको अभियानमा पूर्वमाओवादी नेताहरु जोडिन थालेका छन् ।
शर्माको अभियानसँगै उनको पार्टी गठन प्रक्रियामा कर्णाली प्रदेशका मुख्यमन्त्रीदेखि मन्त्रीसम्म सहभागी हुँदैछन् । उनीहरुले जनार्दनलाई साथ दिने निर्णय गरेका छन् । उनीसँग माथिल्लो तहमा प्रभाव राख्ने राम कार्की, सुदन किराँती, अञ्जना विशंखे, जगप्रसाद शर्मा जोडिएका छन् ।
जनार्दनको साथमा उनका बहिनी नारायणी शर्मा रहेकी छन् । उनी दाप्रतिनिधि सभा सदस्य थिईन् । यस्तै कर्णाली प्रदेशका पूर्वमुख्यमन्त्री राजकुमार शर्मा पनि उनको साथमा छन् । कर्णालीकै पूर्व कृषिमन्त्री भिमप्रकाश शर्मा पनि जनार्दनको साथमा छन् । राजकुमार रुकुम पश्चिमका हुन् भने भिमप्रकाश सल्यानका हुन् ।
अन्य नेताहरु पुष्प न्यौपाने, सन्तोष विष्ट, पदमराज जोशी, ओमप्रकाश पुन, शिवकुमार मण्डल, अशोक जयसवाल, उमेश यादव, भगत बडुवाल, टेकेन्द्र भट्ट, दीपक साउद, विमला सिंह, भीमबहादुर मल्ल, रामप्रसाद न्यौपाने, प्रतिभा केसी, मनऋषि धितालले पनि उनलाई साथ दिएका छन् ।
जनार्दनको साथमा उभिने अनुमान गरिएका रुकुमकै केही माओवादी नेताहरु भने प्रचण्डाको पार्टी एकता गर्ने निर्णयको पक्षमा उभिएका छन् । माओवादीका कर्णाली प्रदेश अध्यक्ष विमला केसी प्रचण्डको पक्षमा उभिएकी छन् । उनी यसअघि कर्णाली प्रदेश सभा सदस्य तथा कृषि मन्त्री भएकी थिईन् । केसी २०७० सालको संविधान सभामा सदस्य थिईन् ।
रुकुम पश्चिमै गोपाल शर्मा पनि प्रचण्डकै पक्षमा उभिएका छन् । जनार्दन गृहमन्त्री हुँदा उनको स्वकीय सचिव भएका शर्मा २०७४ को प्रदेश सभा निर्वाचनमा कर्णाली प्रदेश सभा सदस्य भएका थिए । उनी प्रदेशको अर्थमन्त्री समेत भईसकेका छन् । जनार्दनका निर्वाचन अभियानमा पनि निरन्तर साथ दिईरहने उनले अन्तिममा ‘राजनीतिमा स्वनिर्णय लिने स्वतन्ता भएको’ भन्दै अलग भएका छन् ।
माओवादी केन्द्र रुकुम पश्चिमका संयोजक गोविनद रोका (सचिन) पनि अन्तिममा प्रचण्डको पक्षमा उभिएका छन् । उनी जनार्दनका निकट पात्रमध्येका एक हुन् । उनी जनार्दन अर्थमन्त्री हुँदा सल्लाहकार पनि थिए । यसअघि कर्णाली प्रदेशको अर्थमन्त्री भईसकेका रुकुम पश्चिमकै महेन्द्र केसीले पनि जनार्दनलाई साथ दिएनन् ।
कर्णाली प्रदेशबाट तत्कालीन माओवादी केन्द्रमा प्रभाव राख्ने कर्णाली प्रदेशका नेताहरु कालीबहादुर मल्ल, शक्ति बस्नेत, महेन्द्रबहादुर शाही, सत्या पहाडी लगायतका नेताहरु पनि प्रचण्डकै पक्षमा उभिएका छन् । केन्द्रमा जनार्दन र प्रचण्डबीचको अन्तरविरोधलाई गुटका रुपमा हेरिएको थियो । केन्द्रमा प्रचण्ड–जनार्दन गुट भएपनि कर्णालीमा भने शक्ति–जनार्दन गुट थियो । शक्ति बस्नेतले कर्णालीमा प्रचण्ड गुटको नेतृत्व गर्दा जनार्दन केन्द्र र कर्णालीमा एक्लै हाबी भएका थिए ।