उपसभापति पूर्णबहादुर खड्काले आइतबार विज्ञप्ति जारी गर्दै सभापति देउवा र राणामाथि भएको आक्रमणको निन्दा गरेका हुन् । ‘लोकतन्त्रका लागि जीवन पर्यन्त अविचलित रूपमा संघर्ष गरेका पार्टीका आदरणीय सभापति एवं पूर्वप्रधानमन्त्री शेरबहादुर देउवा र पार्टीका केन्द्रीय सदस्य डा. आरजु राणा देउवा माथिको अमानवीय र बर्बरतापूर्ण भौतिक आक्रमण निन्दनीय एवं भर्त्सना योग्य छ,’ विज्ञप्तिमा भनिएको छ, ‘उहाँहरू उपचारको क्रममा रहनु भएकाले शीघ्र स्वास्थ्य लाभको कामना गर्दछौं ।’
जेनजी पुस्ताको प्रदर्शनका क्रममा भएको मृत्यु एवं खर्बौंको भौतिक संरचनाको विनाशसहितका विषयमा पार्टीले औपचारिक रूपमा धारणा सार्वजनिक गरेको भन्दै उनले कुनै भ्रममा नपर्न आग्रह गरेका छन् ।
‘कांग्रेस सभापति शेरबहादुर देउवा, नेपाली कांग्रेसका केन्द्रीय सदस्य एवं परराष्ट्रमन्त्री डा. आरजु राणा देउवा र अन्य कयौं राजनैतिक नेतृत्व माथिको भौतिक आक्रमण, राष्ट्रपतिद्वारा गरिएको संवाद पहलकदमी, अन्तरिम प्रधानमन्त्रीको घोषणा, प्रतिनिधिसभा विघटन यी समग्र विषयमा पार्टीको धारणा महामन्त्रीद्वयको वक्तव्यबाट र पछिल्लो समय कार्यसम्पादन समितिको बैठकको निर्णयबाट सार्वजनिक गरिएको छ,’ विज्ञप्तिमा भनिएको छ, ‘वर्तमानमा पार्टीको भूमिका संयोजन गरिरहेको नाताले हाम्रा धारणाहरू बारे कुनै अस्पष्टता र अन्योल नरहेको सम्बन्धमा हामी स्पष्ट छौं ।’
जेनजीद्वारा भदौ २३ र २४ गते भएको प्रदर्शनमा युवाहरू सहादत हुनु र खबौं सम्पत्तिको तोडफोड, आगजनी भई पूर्ण क्षति हुनुलाई कांग्रेसले अत्यन्तै दु:खद घटना भनेको छ ।
आन्दोलनको क्रममा जीवन गुमाउने युवाहरू, सुरक्षाकर्मी लगायतप्रति श्रद्धाञ्जली व्यक्त गर्दै कांग्रेसले परिवारजनमा गहिरो समवेदना प्रकट गरेको छ । यस अघि नै घटनाको छानबिन गर्न हामीले माग गरिसकेको भन्दै कांग्रेसले पुन: स्मरण गराएको छ ।
जेनजीको भावना विपरीत अवाञ्छित तत्वले गरेको घुसपैठ र ध्वंसको वास्तविक आकलनको प्रक्रिया अबिलम्ब गर्न पनि कांग्रेसले ध्यानाकर्षण गराएको छ ।
‘जेनजीको भावना विपरीत अवाञ्छित घुसपैठ हुँदा सिंहदरबार, संसद् भवन, सर्वोच्च अदालत, प्रदेशसभा भवनहरूदेखि अनेकौं राजनैतिक, प्रशासनिक, व्यावसायिक प्रतिष्ठान, वित्तीय संस्था, मिडिया हाउस र व्यक्तिका निजी घर समेतमा गरेर खर्बौंको संरचना ध्वस्त गरिएको छ,’ कांग्रेसले भनेको छ, ‘यो अत्यन्तै अकल्पनीय र दु:खद घटना निन्दनीय र भर्त्सना योग्य छ । सरकारले क्षतिको वास्तविक आकलन प्रक्रिया अविलम्ब शुरू गरोस् ।’
यसैगरी पार्टीका अग्रजहरू, नेताहरू, पार्टीका साथीहरू तथा अन्य राजनीतिक दलका नेताहरू माथि भएको भौतिक आक्रमण निन्दनीय भन्दै कांग्रेसले भर्त्सना गरेको छ ।
संसद् विघटन अलोकतान्त्रिक कदम
कांग्रेसले देशकै सर्वोच्च संस्था प्रतिनिधिसभा विघटनको कदमलाई असंवैधानिक भनेको छ ।
‘संविधान बमोजिम जनताबाट लोकतान्त्रिक विधिअनुसार, निर्वाचित देशकै सर्वोच्च प्रतिनिधिमूलक संस्था प्रतिनिधिसभा विघटनको कार्य पूर्णरूपमा अलोकतान्त्रिक र असंवैधानिक छ,’ कांग्रेसले भनेको छ, ‘यस कार्यले देशको संविधान, संविधानद्वारा प्रत्याभूत नागरिक अधिकार, संघीय लोकतान्त्रिक गणतन्त्रतात्मक शासन व्यवस्था र समावेशी चरित्रको राज्य निर्माण गर्ने संविधानको भावनामा कुठराघात भएको छ । यसले लोकतन्त्र र संविधानलाई कमजोर गर्नुका साथै सम्मानित सर्वोच्च अदालतको पूर्ववर्ती सम्बन्धित फैसलाभन्दा विपरीत छ ।’(लाेकान्त्रर)
-1757693751.jpeg)
