शिक्षकहरूको माग पूरा गर्न कांग्रेस गम्भीर छ: देउवा

काठमाडौं, चैत २८
नेपाली कांग्रेसका सभापति शेरबहादुर देउवाले आन्दोलनरत शिक्षकहरूका माग सम्बोधन गर्न कांग्रेस गम्भीर रहेको बताएका छन्।

शिक्षकहरूको मागबारे पार्टीले सरकारसँग पनि कुरा राखिरहेको सभापति देउवाले बताए।
बिहीबार बूढानीलकण्ठमा नेपाल शिक्षक संघका प्रदेश अध्यक्षहरूसँग भएको छलफलमा सभापति देउवाले शिक्षकहरूका माग सम्बोधन गरिनुपर्नेमा जोड दिएका हुन्।
‘शिक्षकहरूका मागप्रति पार्टी गम्भीर छ। मैले प्रधानमन्त्रीजी र अर्थमन्त्रीजीलाई पनि वार्ता र संवादबाट शिक्षकहरूका माग पूरा गर्ने दिशातर्फ अघि बढ्नुपर्छ भनिसकेको छु,’ सभापति देउवाका भनाइ उद्धृत गर्दै कांग्रेस शिक्षा विभाग प्रमुख नैनसिंह महरले भने, ‘शिक्षकहरूले पनि देशको परिस्थिति बुझिदिनुपर्ने हुन्छ। शिक्षकहरूका माग पूरा गर्न पार्टी गम्भीर छ।’
विगतमा सरकारसँग भएका सहमति कार्यान्वयन हुने गरी विद्यालय शिक्षा ऐन जारी गर्न मागसहित नेपाल शिक्षक महासंघको आह्वानमा चैत २० गतेदेखि शिक्षकहरू काठमाडौंकेन्द्रित आन्दोलनमा छन्।
आन्दोलनरत शिक्षकहरूलाई सरकारले वार्तामा पनि बोलाएको छ।

यसअघि कांग्रेस शिक्षा विभाग प्रमुख महरले विज्ञप्ति निकालेर शिक्षकहरूले उठाउँदै आएका माग संवादबाट हल गर्न प्रधानमन्त्री केपी शर्मा ओलीलाई आग्रह गरेका थिए।