सिंजा गाउँपालिका नराकोटको सार्कीवाडा पूर्ण सरसफाई

 सिंजा गाउँपालिका –३ नराकोट गाउँको सार्कीवाडा २० वटा घरघुरी रहेका छन् । यो टोल बस्तीका हरेक घरधुरीमा स्वच्छ खानेपानीका छन् ।

सवैका घरमा शौचालय र फोहोर व्यवस्थापन गर्नका लागि खाडल खनिएको छ । यत्रतत्र कतै पनि फोहोर देखिदैन । निकै स्वाच्छ र सफा गाउँवस्ती रहेको छ । प्रत्येक घरधुरीमा भाडा सुकाउने चाङ पनि बनाएको छ । ४ वर्षअघि पेस नेपाल जुम्लाले ७ लाख बजेटमा निर्माण गरिएको खानेपानीको आयोजनाले पानी पिउन, शौचालय प्रयोग गर्न र सरसफाई गर्न निकै सहज भएको स्थानीय लालभक्त सार्की बताउन्छन् । उनले भने, पहिला निकै दुर्गन्धित, यत्रतत्र फोहोरैफोहोर थियो । पछिल्लो समयमा खानेपानी शौचालयदेखि सवै सरसफाई कुरामा ध्यान दिन थालेपछि यो बस्ती निकै स्वच्छ देखिएको हो ।

पेस नेपाल जुम्लाका कार्यक्रम संयोजक अशोक चौधरीका अनुसार यो बस्तीमा ५/६ वर्षदेखि संस्थाले काम गर्दै आएको छ । उनले भने, अहिले उत्थान परियोजना अन्र्तगत सरसफाईका काम गर्दै आएका छौँ । सरसफाई सवै सुचक पुरा हुँदै आएका छन् । सरसफाईमा अनुगमन निगरानी पनि हुने गरेको छ । शौचालयको सुरक्षित प्रयोग, जोखिमपूर्ण समयमा साबुन पानीले धात धुने अध्यास, महिनावारी स्वच्छता व्यवस्थापन, सुरक्षित खानेपानीको प्रयोग, खानाको स्वच्छता र घर तथा आँगनको सरसफाई जस्ता सुचक यो बस्तीले पुरा गर्दै आएको छ, उनले भने । यी सवै सुचक पुरा गर्दै आएकोले यो बस्तीलाई पूर्ण सरसफाई घोषण गर्ने तयारी गरिएको संयोजक चौधरीले बताए ।