रुस युक्रेनबीच एक–एक हजार युद्धबन्दी रिहा गर्ने सहमति

बिगत तीन वर्षदेखि जारी रुस-युक्रेन युद्धकाबीच एक–एक हजार युद्धबन्दी रिहा गर्ने सहमति भएको छ । शुक्रबार टर्कीको इस्तानबुलमा भएको युक्रेन-रुस वार्तामा दुवै देशले एक–एक हजार युद्धबन्दी रिहा गर्ने सहमति भएको हो ।

बैठकपछि युक्रेनका रक्षामन्त्री रुस्तम उमेरोवले दुवै देश एक-एक हजार युद्धबन्दीको रिहाइमा सहमत भएको जानकारी दिए । उनले भने, हामीले युद्धविराम र मानवीय मुद्दाहरू, विशेष गरी मानिसहरूको अदलाबदलाको विषयमा छलफल गर्‍यौँ । एक हजार व्यक्तिको रिहाइमा सहमति हुनु बैठकको प्रमुख उपलब्धि हो ।

शान्ति वार्तामा रुसी प्रतिनिधिमण्डलको नेतृत्व गरेका भ्लादिमिर मेन्डिन्स्कीले पनि युद्धबन्दीको अदलाबदलासम्बन्धी सहमतिलाई पुष्टि गरेका छन् । उनले भने, युक्रेनी पक्षले राष्ट्रपति भ्लादिमिर पुटिन र भोलोदोमिर जेलेन्स्कीबीच प्रत्यक्ष वार्ताको अनुरोध गरेका छन् । हामीले यो अनुरोध टिपोट गरेका छौँ ।