पाकिस्तानले छिटै नै चीनमा बनेको अध्याधुनिक फाइटर जेट विमान भित्र्याउने तयारी गरेको छ । एक रिपोर्टले उक्त जे-३५ स्टिल्थ फाइटर विमान भित्र्याएपछि दक्षिण एसियाको शक्ति सन्तुलन प्रभावित हुन सक्ने विश्लेषण गरेको छ ।
पाकिस्तानले चीनबाट ४० वटा पाँचौँ पुस्ताको जे- ३५ विमान भित्र्याउँदै छ । त्यसको पहिलो जेट भने यही वर्ष पाकिस्तानले ल्याउने सम्भावना छ ।
पाकिस्तानी रक्षा अधिकारीहरूले यो विमान आएपछि भारतीय वायु सेनाको तुलनामा पाकिस्तानी वायु सेना १२ देखि १४ वर्षसम्म अघि हुने दावी गरेका छन् ।
भारतीय सञ्चार माध्यम नवभारत टाइम्सको अनलाइन संस्करणले लेखेको छ, ‘पाकिस्तानको एयर फोर्सका सेवानिवृत्त अधिकारी एयर कोमोडोर जियाउल हक शम्सीलले भनेका छन्- जे-३५ए फ्लिट पाएपछि पाकिस्तान भारतको अहिलेको वायु क्षमताको तुलनामा १२ देखि १४ वर्ष अगाडि हुनेछ ।’
आगामी १२ देखि १४ वर्षसम्म पनि भारतले पाँचौँ पुस्ताको विमान तैनाथ गर्ने सम्भावना नरहेको उनको दावी छ ।
जे-३५ए पाँचौँ पुस्ताको स्टिल्थ फाइटर जेट भएको रिपोर्टमा उल्लेख छ । यो जेट शेनयाङ एयरक्राफ्ट कर्पोरेशनले विकसित गरेको हो । चीनसँग पाँचौँ पुस्ताको अर्को फाइटर जेट जे-२० माइटी ड्रागन पनि छ, तर यो पिपुल्स लिबरेसन आर्मी (चिनियाँ सेना) को लागि मात्र हो ।
तर, जे-३५ए भने विदेशमा निर्यात गर्नका लागि चीनले विकसित गरेको जेट हो । पाकिस्तानी एयर फोर्स (पीएएफ) अघिल्लो वर्ष जे-३५ए प्रति आकर्षित भएको थियो ।
पाकिस्तान एयर फोर्सका चिफ एयर मार्सल जहिर अहमद बाबर सिद्धूले उक्त जहाज छिटै नै पीएएफको लडाकु दलको हिस्सा हुने बताएका थिए । उनले जे-३५ए किन्नका लागि कुराकानी भएको उल्लेख गर्दै उक्त जहाज पाकिस्तानी एयर फोर्सको हिस्सा हुने बताएका थिए ।
यो जहाजको डेलिभरी अझै केही समयपछि हुने अपेक्षा कतिपयको थियो । तर, चीनले अब उक्त जहाज पाकिस्तानलाई छिटै डेलिभरी दिन लागेको बताइएको छ ।
डिफेन्स सेक्युरिटी एसियाका अनुसार हालैको रिपोर्टले बेइजिङले जे-३५ए को डेलिभरीलाई तिव्रता दिइरहेको संकेत गरेको छ । जसमा प्रारम्भिक विमानहरू सन् २०२५ मै पाकिस्तान आइपुग्ने सम्भावना छ । यो पहिले अनुमान गरिएको दुई वर्षको समयसीमाभन्दा धेरै पहिले रहेको उक्त रिपोर्टमा उल्लेख छ ।
पाकिस्तानले पहिलो समूहका लडाकु पाइलटहरूलाई जे-३५ए प्लेटफर्ममा तालिन सुरु गर्न चीन पठाइसकेको छ । यसले सम्झौता पूर्वनिर्धारित चरणभन्दा अगाडि बढेको बुझिने रिपोर्टमा उल्लेख छ । चीनले जे-२० र पाकिस्तानले जे-३५ए जेट आफ्नो सैन्यदलमा समावेश गर्दा त्यसले भारतमाथि दबाब बढ्ने उक्त रिपोर्टमा उल्लेख छ ।
केही समयअघि भएको भारत र पाकिस्तानबीचको आक्रमण-प्रत्याक्रमणमा पाकिस्तानले चीनमा नै बनेको जे-१०को प्रयोग गरेको थियो । यसका अलावा पाकिस्तानले चीनमा बनेको एचक्यू-९ सिस्टम तथा चीनसँग किनेको अन्य हतियार पनि प्रयोग गरेको समाचारमा उल्लेख छ ।
