सल्यानमा बिहीबार राति मोटरसाइकल र अटो एक आपसमा ठोक्किएर दुर्घटना हुँदा एकको मृत्यु भएको छ भने एक घाइते भएका छन् ।
जिल्लाको बन्गाड कुपिण्डे नगरपालिका–१ सल्लीबजारबाट बालुवा संग्रहीतर्फ जाँदै गरेको भे १ ह ९९३० नम्बरको अटो र विपरीत दिशाबाट आउँदै गरेको भे १० प ८३८३ नम्बरको मोटरसाइकल अम्रा नजिकै ठोक्किएर दुर्घटना हुँदा मोटरसाइकलमा सवार बन्गाड कुपिण्डे नगरपालिका–५ का वर्ष २१ का नवीन रानाको मृत्यु भएको हो । जिल्ला प्रहरी कार्यालय सल्यानका सूचना अधिकारी प्रहरी निरीक्षक बाबुराम बस्नेतका अनुसार मोटसाइकल चालक बन्गाड कुपिण्डे नगरपालिका–५ बस्ने वर्ष २१ का सविन राना सख्त घाइते भएका छन् ।
अटो र मोटरसाइकल एक आपसमा ठोक्किएर दुर्घटना हुँदा सख्त घाइते भएका दुवैलाई स्थानीय मेडिकलमा सामान्य उपचारपछि नेपालगन्ज लगिएको र नवीन रानाको भेरी अस्पतालमा मृत्यु भएको प्रहरी निरीक्षक बस्नेतले जानकारी दिए। उनका अनुसार घाइते सविन रानाको नेपालगन्जस्थित नेसनल अर्थोपेडिक अस्पतालमा उपचार भइरहेको छ । इलाका प्रहरी कार्यालय सल्यानबाट खटिएको प्रहरी टोलीले अटो चालक गुर्वाकोट नगरपालिका–३ सुर्खेतका वर्ष २८ का ढाकवीर कामीलाई नियन्त्रणमा लिएको उनले जानकारी दिए ।
