बजेटले जनताको भरोसा जित्ने र देशलाई समृद्धिको बाटोमा अघि बढाउने पूर्वमन्त्री डा.महतोको विश्वास

देशको अर्थतन्त्रलाई दीर्घकालिन सुधारको दिशातर्फ उन्मुख गराउन, स्वरोजगार र उद्यमशीलतालाई प्रोत्साहन दिन, घरेलु उत्पादन वृद्धि गर्न तथा आयातमा निर्भरता घटाउने लक्ष्यसहित ल्याईएको नीति तथा कार्यक्रम पनि प्रशंसनीय रहेको महतोको भनाई छ । महतोले जारी गरेको वक्तव्यमा भनिएको छ,‘विशेषगरि युवाहरुलाई लक्षित गर्दै सञ्चालित कार्यक्रमहरु सीपमूलक तालिम, स्टार्टअप अनुदान, कृषि तथा प्रविधिमा नवप्रवर्तनको प्रर्वद्धन–देशको समग्र आर्थिक पुनरुत्थानमा टेवा पुर्याउने विश्वास लिएका छौं ।’

बजेटले निजी क्षेत्रलाई लगानीमैत्री वातावरण प्रदान गर्नेपनि महतोको विश्वास छ । उनले राज्य र निजी क्षेत्र साझेदारी (पीपीपी) मार्फत आधारभूत संरचना विकासमा गति दिने नीति देशको दीर्घकालिन विकासको मेरुदण्ड सावित हुने आशा गरिएको बताएका छन् ।

महतोले विज्ञप्तीमार्फत भनेका छन्–‘जनता समाजवादी पार्टी सधैं लोकतान्त्रिक, समाजवादी र समावेशी मूल्य र मान्यताको पषमा रहेर उत्पादनमूलक अर्थतन्त्र निर्माणमा योगदान गर्न तयार रहेको छ । प्रस्तुत बजेटले जनताको भरोसा जित्ने र देशलाई आर्थिक समृद्धिको बाटोमा अघि बढाउने अपेक्षा हामीले गरेका छौं ।’