दैलेखमा ठूलो परिमाणमा मिथेन ग्यासको सम्भावना

दैलेखमा भइरहेको पेट्रोलियम अनुसन्धानको प्रारम्भिक नतिजाले ठूलो मात्रामा मिथेन ग्यास रहेको संकेत गरेको छ। खानी तथा भूगर्भ विभागका प्रवक्ता दिनेशकुमार नापितका अनुसार चिनियाँ प्राविधिक टोलीको अध्ययनले करिब १ अर्ब १२ करोड घनमिटर क्षेत्रफलमा मिथेन ग्यास हुनसक्ने देखाएको हो।

यो अध्ययन चिनियाँ पक्षले नेपालसँगको सम्झौताअनुसार सहयोगस्वरूप गरेको हो। यद्यपि ग्यासको व्यावसायिक उत्पादनको सम्भाव्यता बुझ्न थप अध्ययन आवश्यक रहेको बताइएको छ।

नापितका अनुसार अब सम्भावित ठाउँहरूमा परीक्षण उत्पादन गर्नुपर्ने भए पनि नेपालसँग जनशक्ति र प्रविधिको कमी रहेको छ। विभागले थप अध्ययनका लागि चिनियाँ पक्षसँग पुनः सहयोग लिन सरकारलाई सुझाव दिइसकेको छ।

प्रारम्भिक अनुमानले मिथेन ग्यासको उपस्थिति देखाए पनि कति परिमाणमा व्यावसायिक रूपमा उत्पादन गर्न सकिन्छ भन्ने निष्कर्ष आगामी डिसेम्बरसम्म आउने अपेक्षा गरिएको छ।