शुभमको स्पिनमा जापान अल्झियो, नेपाललाई ८१ रनको लक्ष्य

टोलीका कप्तानसमेत रहेका चार्लीले ४८ बलमा चार चौका पनि प्रहार गरे । गाबी हराहिन्जले टोलीको खातामा १३ रन थपे । जापानका अन्य ब्याट्सम्यानले भने दोहोरो अंकमा रन बनाउन सकेनन् । टोलीको कुल स्कोर ५० रन पुग्नुअगावै जापानले पाँच प्रभावशाली विकेट गुमाइसकेको थियो ।

जापानका तीन ब्याट्सम्यानले त खातासम्म खोल्न सकेनन् । नेपाली टोलीका उदीयमान स्पिनर शुभम खनाल एक्लैले पाँच विकेट लिए । उमेरले भर्खरै १४औँ वर्षमा प्रवेश गरेका उनले १० ओभरमा तीन मेडन राख्दै केवल १५ रन खर्चिए । यो उनको उत्कृष्ट प्रदर्शन पनि हो ।

नेपाली टोली मंगलबारको खेलमा जापानलाई हराउँदै लगातार दोस्रो जीत निकाल्ने दाउमा छ । यसअघि आफ्नो पहिलो खेलमा नेपालले सिंगापुरलाई ६ विकेटको फराकिलो अन्तरले हराएको थियो । त्यो खेलमा पनि नेपालका बलर र ब्याट्सम्यान दुवैले उत्कृष्ट प्रदर्शन गरेका थिए ।

जापान पनि आफ्नो पहिलो खेलमा विजयी भएको थियो । जापानले आफ्नो पहिलो खेलमा भुटानलाई २१५ रनको विशाल अन्तरले हराएको थियो । समूह ‘ए’ तालिकामा जापान दुई अंकसहित पहिलो स्थानमा छ ।

समान अंक जोडेको नेपाल दोस्रो स्थानमा छ । एक–एक खेल खेलेका सिंगापुर र भुटानले अंक बटुल्न सकेका छैनन् । उक्त समूहमा रहेको पाँचौँ टोली इन्डोनेसियाले भने हालसम्म एक खेल पनि खेलेको छैन ।

नेपालले आफ्नो तेस्रो खेल जुन २९ तारिखमा इन्डोनेसियासँग खेल्नेछ । नेपाली टोलीले समूहगत चरणको आफ्नो अन्तिम खेल भने जुलाई १ तारिखमा भुटानसँग खेल्नेछ ।