स्पेनको सेभियामा आयोजित संयुक्त राष्ट्रसंघको विकास वित्तसम्बन्धी उच्चस्तरीय सम्मेलनलाई सम्बोधन गर्दै उनले भने, ‘यो केवल वित्तीय संकट होइन, यो एक मानवीय संकट हो।’

प्रधानमन्त्री ओलीले अतिकम विकसित राष्ट्रहरूले भोगिरहेको पीडाको भावनात्मक चित्र प्रस्तुत गर्दै भने, ‘गरिबी अझै व्यापक छ, भोकमरि बढ्दो छ, र हाम्रा कैयौं बालबालिकालाई कुपोषणले सताइरहेको छ।’

उनले ऋणको बोझले थिचिएका राष्ट्रहरूको दयनीय अवस्थालाई औंल्याउँदै थपे, ‘दुःखको कुरा, हामीले स्वास्थ्य वा शिक्षामा गर्ने लगानीभन्दा बढी रकम ऋण भुक्तानीमा खर्च गरिरहेका छौं।’

आफ्नो सम्बोधनमा उनले अतिकम विकसित राष्ट्रहरूका युवाहरूका सपनाहरू पहुँचभन्दा टाढा हुँदै गएको र उनीहरूले भरोसा गरेको अन्तर्राष्ट्रिय सहायता प्रणाली पनि सबैभन्दा बढी आवश्यक परेकै बेला कमजोर बन्दै गएकोमा चिन्ता व्यक्त गरे।

‘एकपछि अर्को संकटले हाम्रो अर्थतन्त्रलाई हल्लाएको छ,’ उनले भने, ‘द्वन्द्व र जलवायु संकटले वर्षौंको प्रगतिलाई शून्यमा झारिदिएको छ।’

प्रधानमन्त्री ओलीले वैदेशिक रोजगारीमा गएका नागरिकले पठाएको रेमिट्यान्सलाई ‘जीवनरेखा’ को संज्ञा दिँदै त्यसलाई घर पठाउँदा लाग्ने चर्को शुल्क अन्यायपूर्ण रहेको बताए।

सम्मेलनले पारित गरेको ‘कम्प्रोमिसो डे सेभिया’ (सेभिया प्रतिबद्धता) ले केही आशा जगाएको बताउँदै उनले विश्व समुदायलाई ती वाचाहरूलाई इमान्दारीपूर्वक कार्यान्वयन गर्न आग्रह गरे।

‘सही वित्तीय लगानी भएमा हामी गरिबीसँग लड्न, हाम्रा जनताको क्षमता निर्माण गर्न र दिगो अवसरहरू सिर्जना गर्न सक्छौं,’ उनले भने।