रुकुम पश्चिम: अस्पताल भवन निर्माणमा खटिएका कामदार कोठामा मृत फेला

 रुकुम पश्चिमको जिल्ला अस्पताल सल्लेको निर्माणाधिन भवनका एक कामदार कोठा भित्रै मृत अवस्थामा फेला परेका छन् ।

मुसिकोट नगरपालिका–१ स्थित अस्पतालकोनिर्माणाधिन भवनका कामदार काठमाडौं घर भएका ४० वर्षीय दिलिप तामाङ भाडामा बस्दै आएको कोठामा मृत अवस्थामा फेला परेको प्रहरीले जनाएको छ । जिल्ला प्रहरी कार्यालयका अनुसार तामाङ तीन महिनादेखि स्थानीय भिमा थापाको घरमा कोठा भाडामा लिएर बस्दै आएका थिए । कोठामा एक्लै बस्ने तामाङलाई मंगलबार बिहान बोलाउन जाँदा नबोलेपछि प्रहरीलाई खबर आएको थियो ।

सल्लेस्थित बिमानस्थल सुरक्षा गार्डबाट प्रहरी बरिष्ठ नायब निरीक्षक बिष्णु बिनोद कोईरालाको कमाण्डमा गएको प्रहरी टोलीले स्थानीय जनप्रतिनिधिको रोबरमा ढोका फोरी हेर्दा तामाङलाई खाटमा सुतिरहेको र मुखबाट फिज निकालेको अवस्थामा फेला पारिएको थियो । तत्कालै जिल्ला अस्पताल सल्ले लिईएकोमा चिकित्सकले मृत घोषणा गरेको प्रहरीले जनाएको छ । मृत्युको कारण भने खुल्न सकेको छैन ।