काठमाडौं। सरकारले बालबालिकाको स्वास्थ्य सुधार तथा पोषण प्रवद्र्धन गर्ने उद्देश्यले राष्ट्रिय भिटामिन ‘ए’ र जुकाको औषधि वितरण कार्यक्रम कात्तिक १७ र १८ गते सञ्चालन गर्ने भएको छ।
स्वास्थ्य तथा खाद्य स्वच्छता मन्त्रालयअन्तर्गतको परिवार कल्याण महाशाखाका अनुसार दसैं बिदाका कारण यसअघि निर्धारित समयमा कार्यक्रम सञ्चालन गर्न कठिनाइ भएपछि नयाँ मिति तय गरिएको हो। कार्यक्रमअन्तर्गत ६ महिनादेखि ५९ महिनासम्मका बालबालिकालाई भिटामिन ‘ए’ क्याप्सुल खुवाइनेछ। त्यस्तै, १२ महिनादेखि ५९ महिनासम्मका बालबालिकालाई जुकाको औषधि वितरण गरिने महाशाखाले जनाएको छ।
बालबालिकामा भिटामिन ‘ए’ को कमी हुन नदिन तथा जुकाको संक्रमणबाट जोगाउन यो कार्यक्रम सञ्चालन गरिँदै आएको छ। महाशाखाले आफ्ना बालबालिकालाई तोकिएको मितिमा नजिकैको स्वास्थ्य संस्था वा सम्बन्धित वितरण केन्द्रमा लगेर औषधि खुवाउन अभिभावकलाई आग्रह गरेको छ। कार्यक्रम प्रभावकारी बनाउन निर्धारित उमेर समूहका सबै बालबालिकाको सहभागिता सुनिश्चित गर्नुपर्ने स्वास्थ्य अधिकारीहरूको जोड छ।