Blog

काठमाडौं । सरकारद्वारा गठित उच्चस्तरीय आर्थिक सुधार सुझाव आयोगले राजनीतिक दलहरूलाई नगद चन्दा संकलनमा रोक लगाउन सुझाव दिएको छ ।

दलले निश्चित सर्त र सीमाको अधिनमा रहेर बैंकिङ प्रणाली प्रयोग गरी चन्दा लिन पाउने व्यवस्था गर्न समेत आयोगले सुझाव दिएको छ ।
पूर्वअर्थसचिव रामेश्वर खनाल नेतृत्वको आयोगले शुक्रबार उपप्रधान तथा अर्थमन्त्री विष्णु प्रसाद पौडेलसमक्ष आफ्नो प्रतिवेदन बुझाएको छ ।
प्रतिवेदनमा निर्वाचनका बेला भने कुनै पनि उम्मेदवारले चन्दा लिन नपाउने व्यवस्था गर्न समेत भनिएको छ ।

निर्वाचनमा उम्मेदवार हुने व्यक्तिले व्यक्तिगत सम्पत्ति प्रयोग गरेर वा व्यक्तिगत चन्दा उठाएर निर्वाध खर्च गर्न पाउने व्यवस्थाले निर्वाचित भइसकेपछि लगानी गरेको रकम जुनसुकै तवरबाट उठाउन प्रयत्न गर्ने भन्दै यस्तो आर्थिक स्रोतको समेत नियमन गर्न आयोगले सुझाव दिएको छ ।
संघीय सरकारले निर्वाचन आयोगमार्फत गरिदिने उम्मेदवारको अतिरिक्त कुने दलसँग आवद्ध उम्मेदवारलाई दलले आफ्नो कोषबाट निर्वाचन आयोगले तोकेको सीमा नबढ्ने गरी प्रचार खर्च भने दिन सक्ने प्रावधान ल्याउन समेत सुझाव दिइएको छ । सबै राजनीतिक दलले आफ्नो आम्दानी र खर्चको विवरण त्रैमासिक रुपमा निर्वाचन आयोगमा पठाउनु पर्ने र निर्वाचन आयोगले वेवसाइटमार्फत सार्वजनिक गर्ने व्यवस्था मिलाउन समेत आयोगले सुझाव दिएको छ । सबै राजनीतिक दलको स्रेस्ताको लेखा परीक्षण महालेखा परीक्षकको कार्यालयबाट हुने कानूनी व्यवस्था गर्न समेत आयोगले भनेको छ ।

अमेरिकाको न्यूयोर्कस्थित हडसन नदीमा बिहीबार (२८ चैत) भएको हेलिकप्टर दुर्घटनामा परेर ६ जनाको मृत्यु भएको छ । उक्त दुर्घटनामा हेलिकप्टरमा सवार सबै ६ जना यात्रुको मृत्यु भएको हो ।

मृतकहरू अमेरिका घुम्न पुगेका स्पेनी पर्यटक रहेका बताइएको छ । तीन बालबालिकासहित पाँच जना स्पेनिस र एक पाइलट गरी ६ जनाको मृत्यु भएको न्युयोर्क शहरका मेयर एरिक एडम्सलाई उद्धृत गर्दै बीबीसीले जनाएकोछ ।
न्यूयोर्क प्रहरी आयुक्त जेसिका टिस्चले दुर्घटनाको कारणबारे अनुसन्धान भइरहेको र मृतकका परिवारसँग सम्पर्क नगरिएसम्म पीडितहरूको पहिचान खुलासा नगरिने बताएकी छन् ।
म्यानहट्टनको हेलिपोर्टबाट उडान भरेको उक्त हेलिकप्टर दुर्घटनाको भिडियो फुटेजमा हेलिकप्टर आकाशबाट उल्टो खसेर हडसन नदीमा ठोक्किएको
देखिन्छ ।

काठमाडौं ।
उच्चस्तरीय आर्थिक सुधार सुझाव आयोगले सामाजिक सुरक्षा खर्चहरू थप बढ्न नदिने उपायहरू अवलम्वन गर्न सरकारलाई सुझाव दिएको छ।
शुक्रबार आयोगको पूर्ण प्रतिवेदन बुझाउदै चालु खर्च भित्र सामाजिक सुरक्षा खर्च तीब्रदरमा बढिरहेको सन्दर्भमा यसमा हुने खर्च थप बढ्न नदिन सरकारलाई आग्रह गरेको हो।

प्रदेश सरकार र स्थानीय तहहरूले समेत विभिन्न खालका सामाजिक सुरक्षा खर्च गरिरहेको सन्दर्भमा कतिपय सामाजिक सुरक्षाको व्यवस्था हटाउन वा घटाउन सुझाव दिइएको छ। ज्येष्ठ नागरिक भता पाउने उमेर पुनः ७० वर्ष कायम गर्न भनिएको छ।

यसअघि पनि ७० वर्ष उमेर रहेकोमा शेरबहादुर देउवा नेतृत्वको चुनावी सरकारले ६८ वर्षमा झारेको थियो।

छात्रवृत्ति लगायत सामाजिक सुरक्षालाई राज्य सुविधा परिचय पत्रको आधारमा लक्षित बनाउँदै लैजान आग्रह गरिएको छ।

योगदानमा आधारित सामाजिक सुरक्षाको दायरा फराकिलो पार्न, सामाजिक सुरक्षा प्रदानमा राष्ट्रिय परिचय पत्रको प्रयोग बढाई दोहोरो सुविधा प्रदान नियन्त्रण गर्न, सार्वजनिक खर्च पुनरवोलकन आयोग २०७५ ले सुझाव गरेअनुरूप अनावश्यक चालू खर्च कम गर्न आयोगले सिफारिस गरेको छ।
संघीय परिवेशमा प्रशासनिक पुनर्संरचना गर्न, कार्य अधिकार प्रदेश र स्थानीय तहमा गएको अवस्थामा संघीय कार्यालयहरू घटाउने र कर्मचारी संख्या कम गर्न पनि आयोगको सुझाव छ।
सार्वजनिक वित्तलाई व्यवस्थित गर्ने सवालमा सावाँ-ब्याज भुक्तानीको दायित्व बढिरहेको सन्दर्भमा उच्च प्रतिफल दिने आयोजना लक्षित ढंगले मात्र ऋण परिचालन गर्न भनिएको छ। संघीय सरकारले व्याज तिरेर ऋण लिने तर प्रदेश सरकार र स्थानीय तहमा हस्तान्तरण गरेको अनुदान रकम खर्च नभइ शुन्य व्याजमा बैकहरूमा रहने प्रवृतिमा सुधार ल्याउनआयोगको सुझाव छ। यसलाई सुधार गर्न प्रदेश सरकार र स्थानीय तहले खर्च गरेपछि संघीय सरकारबाट भुक्तानी दिने व्यवस्था गर्नुपर्ने उल्लेख गरिएको छ। प्रदेश र स्थानीय तहको खर्च पनि एकल खाता प्रणालीमा ल्याउन पनि सुझाव दिइएको छ।
आयोगले प्रदेश सरकार र स्थानीय तहबाट कार्यान्वयन हुने सानादेखि मझौला विकास निर्माणका कामहरू संघीय सरकारले बजेटमा समावेश नगर्न आग्रह पनि गरेको छ। उच्च प्रतिफल दिने सही आयोजनाहरू छनोट गरी समयमा नै सम्पन्न गर्न आयोगको सुझाव छ।

काठमाडाैँ । नेपाली बजारमा आज (२९ चैत) सुनचाँदीको मूल्य बढेको छ । सुनको मूल्य प्रतितोला अघिल्लो दिनको तुलनामा रु तीन हजार ९०० ले बढेको हो ।

नेपाल सुनचाँदी व्यवसायी महासङ्घका अनुसार बिहीबार प्रतितोला रु रु एक लाख ८१ हजार १०० मा कारोबार भएको सुनको मूल्य आज प्रतितोला रु एक लाख ८५ हजार कायम भएको छ । यो हालसम्मकै उच्च मूल्य हो ।

साथै आज चाँदीको मूल्य पनि बढेको छ । बिहीबार प्रतितोला रु एक हजार ९०० मा कारोबार भएको चाँदी आज रु पाँचले बढेर रु एक हजार ९०५ पुगेको छ ।

काठमाडौं । राष्ट्रिय प्रजातन्त्र पार्टी (राप्रपा)ले चैत १५ गते तीनकुनेमा भएको हिंसात्मक घटनाको सम्पूर्ण जिम्मा प्रधानमन्त्रीले लिनुपर्ने बताएको छ ।

प्रतिनिधि सभा अन्तरगतको कानुन न्याय तथा मानवअधिकार समितिको शुक्रबारको बैठकमा राप्रपाका सांसद ध्रुव बहादुर प्रधानले तीनकुनेको घटना सरकारले नै नियोजित रुपमा गराएको आरोप लगाए । ‘उत्तेजित गराउने काम सरकारले गर्यो । हाम्रो बुझाइ– त्यो घटना नियोजित रुपमा गरेको छ,’ सांसद प्रधानले भने, ‘मैले आरोप लगाएँ– प्रधानमन्त्री चुक्नुभएको छ । उक्साहटको काम उहाँले गर्नुभएको छ ।’

यही चैत १५ गते काठमाडौंको तीनकुनेमा भएको राजवादीको प्रदर्शनको क्रममा दुई जनाको ज्यान गएको थियो भने तोडफोड र आगजनीबाट निजी तथा सार्वजनिक सम्पत्तिमा क्षति पुगेको थियो ।

सोही दिन प्रदर्शनीमार्गमा गणतन्त्र पक्षधरहरुले गरेको प्रदर्शन सभ्य थियो । राजावादीहरुले गरेको प्रदर्शन भने तनावपूर्ण भएको थियो ।

राप्रपा सांसद प्रधानले प्रहरीले तीनकुनेको मञ्चमा टियर ग्यास हानेर प्रदर्शनकारीलाई उत्तेजित बनाएको र अप्रिय घटना भएको जिकिर गरे । ‘राजावादी र गणतन्त्रवादी भनेर कम्पेयर गर्न खोजियो । यो ठिक र त्यो बेठीक भन्न खोजियो । प्रधानमन्त्रीले शान्त भनेको सभामा टियर ग्यास हानिएको थियो भने शान्त हुन्थ्यो ?’ प्रधानले प्रश्न गरे ।

पृष्ठभूमि ख्याल नगरी घटनाको वास्तविकता बुझ्न नसकिने उल्लेख गर्दै उनले थपे, ‘राष्ट्रियगान बज्दै गर्दा टियर ग्यास हानिएको छ । अन्तिमसम्म ७/८ सय टियर ग्यास हानियो । यसले देखाउँछ– उत्तेजित गराउने काम सरकारले नै गर्‍यो ।’
उनले थपे, ‘त्यो दिन चेन अफ कमान्ड ब्रेक भएको छ । नेतृत्वको हिसाबले प्रधानमन्त्रीले सम्पूर्ण जिम्मेवारी लिनुपर्छ ।’
तीनकुने घटनाको निश्पक्ष छानबिन गरेर सही निचोडमा पुग्न न्यायीक आयोग गठन गर्नुपर्ने उनले बताए । आफूहरुले सरकार र प्रधानमन्त्रीलाई जिम्मेवार देखेको तर सरकारले अस्विकार गरिरहेको अवस्थामा न्यायीक आयोग बनाइनु उपयुक्त हुने उनको राय छ ।

कालिकोट । दुर्गम गाउँमा आयोजित स्वास्थ्य शिविरमा बिरामीको भीड लागेको छ । यहाँको नरहरिनाथ आधारभूत अस्पतालमा आयोजित बृहत् स्वास्थ्य शिविरमा तीन दिनमा ५ हजार २ सय २२ जना बिरामीले उपचार पाएको अस्पताल प्रमुख डा. शिवनाथ यादवले जानकारी दिए ।

यति धेरै बिरामी छन् भन्ने त हामीलाई लागेकै थिएन, उनले भने, रोग लुकाएर बसेका धेरै रहेछन् । उनले आइतबारदेखि सुरु भएको ३ दिने विशेषज्ञ स्वास्थ्य शिविर बिरामीको चापले लम्बिएर बुधबार बिहानमात्र चिकित्सकको टोलीलाई बिदाइ गरिएको बताए । एकरएक पाइला फाउन्डेसनसँग समन्वयपछि नरहरिनाथ गाउँपालिकाको विकट बस्तीका नागरिकलाई पहिलो पटक ३२ जना विशेषज्ञ टोलीलाई स्वास्थ्य सेवा दिन सफल भएको पालिका अध्यक्ष नगेन्द्रबहादुर विष्टले बताए । शिविर यति प्रभावकारी होला भनेर मैले पनि सोचेको थिइन्ँ, उनले भने, काठमाडौंमा पाइने स्वास्थ्य सेवा गाउँमै पाउँदा नागरिक पनि खुशी छन् । उनले नरहरिनाथका बासिन्दाका लागि आगामी दिनमा पनि यस्तै खालका विशेषज्ञ स्वास्थ्य सेवा दिन गाउँपालिकाले बजेट विनियोजन गर्ने प्रतिबद्धता गरे । योगी नरहरिनाथ आधारभूत अस्पतालबाट प्राप्त जानकारीअनुसार अत्याधुनिक उपकरणसहित आएको विशेषज्ञ टोलीले १५ प्रकारका सेवा दिएको छ । शिविरमा ७ सय ९९ जनाको आँखा परीक्षण गरिएकोमा १ सय १ जनाको शल्यक्रिया गरिएको छ । ६ वर्षदेखि दुवै आँखा बन्द भएकी नरहरिनाथ–६ माल्कोटकी ६६ वर्षीया मना विश्वकर्माले ज्योति फर्किएकोमा खुशी हुँदै साँच्चिकै गाउँमा सरकार पुगेको महसुस भएको बताइन् ।

नरहरिनाथ गाउँपालिका स्वास्थ्य शाखा प्रमुख मनोज बोगटीका अनुसार १ हजार ४ जनाले जनरल मेडिसिन सेवा पाएको शिविरमा ६ सय ५४ जनाले हाडजोर्नी रोग सेवा, ५ सय २४ जनाले नाक, कान, घाटी रोग सेवा पाएका छन् भने २३ जनाको कानको शल्यक्रिया भएको छ । त्यस्तै, २ सय ३९ ले दाता रोगको उपचार गराएको शिविरमा २ सय ५२ जनाको सामान्य अप्रेशन, ३ सय २९ ले छाला रोगको उपचार गरिएको छ भने २ सय २७ बालबालिका र ३ सय ६७ जना महिलाले स्त्री रोग सेवा पाएका छन् । २ सय ४७ जनाको भिडियो एक्स(रे, ८१ जनाको सादा एक्सरे, । ३ सय ४३ जनाको प्रयोग शाला परिक्षण, ३ जनाको इसिजी, १७ जनाको इन्डोस्कोपी गरिएको छ ।

महाबैमा ३ सय ४७ जनाको आँखा जाँच
यहाँको महाबै गाउँपालिकामा संचालित आँखा शिविरमा ४ सय ५३ जनाको आँखा जाँच भएको छ । आइ केयर फाउडेसन काठमाडौं र हिमालय आँखा अस्पताल पोखराको सहयोग र नेपाल नेत्रज्योति संघ कालीकोटअन्तर्गतको आँखा उपचार केन्द्र मान्मको सहयोगमा महाबैस्थित आधारभूत अस्पताल ओदामा पहिलो पटक आँखा शिविर संचालन भएको पालिका अध्यक्ष खेमबहादुर सिंहले जानकारी दिए । उनकाअनुसार शिविरमा ६७ जनाको शल्यक्रिया भएको छ ।

काठमाडाैं ।   काठमाडौंको तीनकुनेमा अराजक प्रदर्शन गराएर फरार दुर्गा प्रसाईंलाई पक्राउ गरेर काठमाडौं ल्याइएको छ ।
बिहीबार भारतको आसामबाट पक्राउ परेका उनलाई झापाबाट बुद्ध एयरको विमानबाट काठमाडौं ल्याइएको हो ।
प्रसाईंलाई चन्द्रगढी विमानस्थलबाट त्रिभुवन अन्तर्राष्ट्रिय विमानस्थलमा ल्याइएको हो ।
काठमाडौंको तीनकुनेमा चैत १५ गते भएको हिंसात्मक घटनापछि भागेर भारत गएका प्रसाईं आसामबाट पक्राउ परेका थिए ।
त्यहाँबाट उनलाई आज बिहान झापा ल्याइएको थियो । विमान चढ्ने क्रममा उनले आफैं पक्राउ परेको बताएका छन् ।
अब उनलाई सिधै जिल्ला प्रहरी परिसर काठमाडौं लगिने छ । उनीविरुद्ध राज्यविरुद्धको अपराध र संगठीत अपराधमा म्याद थप्ने तयारी छ ।
विमानस्थल परिसरमा बाक्लो सुरक्षाकर्मीको उपस्थिति छ ।

काठमाडाैं ।   काठमाडौंको तीनकुनेमा अराजक प्रदर्शन गराएर फरार दुर्गा प्रसाईंसँगै उनका अंगरक्षक दीपक खड्कालाई पनि प्रहरीले पक्राउ गरेको छ ।
प्रहरी प्रधान कार्यालयका प्रवक्ता डीआइजी दिनेशकुमार आचार्यका अनुसार राज्यविरुद्ध र संगठित अपराध कसुरमा प्रसाईँ र खड्कालाई झापाको भद्रपुरबाट नियन्त्रणमा लिइएको हो ।
उनलाई भद्रपुरबाट विमानमार्फत् काठमाडौं ल्याइँदैछ ।
चैत १५ गतेदेखि नै फरार रहेका प्रसाईँ र खड्का भागेर भारत पुगेका थिए । उनीहरूलाई आज आसाम प्रहरीको सहयोगमा झापाबाट नियन्त्रणमा लिइएको
हो ।
प्रहरीको विशेष ब्यूरो र काठमाडौं उपत्यका अपराध अनुसन्धान कार्यालयको टोली प्रसाईँ र खड्कालाई पक्राउ गर्न भारत पुगेको थियो ।
नेपाल–भारतबीच सुपुदगी सन्धि नभएकै कारण उनीहरुलाई सीमामा ल्याएर भारतीय प्रहरीेले हस्तान्तरण गरेको उच्च प्रहरी स्रोतले बतायो ।
प्रसाईंको सचिवालयले भने बिहीबार आसाम राज्यको प्रहरीसमक्ष आत्मसमर्पण गरेको सामाजिक सञ्जाल फेसबुकबाट जानकारी गराएको थियो ।
प्रसाईंमाथि चैत १५ गते तीनकुनेमा भएको प्रदर्शनमा हिंसा भड्काएको आरोप छ ।
तीनकुनेमा भएको राजावादीको हिंसात्मक प्रदर्शनमा एक पत्रकारसहित दुई जनाको ज्यान गएको थियो भने दर्जनौं घर र गाडीमा तोडफोड र आगजनी गरिएको थियो ।
प्रदर्शनकारीले कोटेश्वरस्थित भाटभटेनीमा समेत लुटपाट गरेका थिए । प्रदर्शनका क्रममा प्रसाईंले बलपूर्वक प्रहरी घेरा तोड्दै भीडलाई उत्तेजित बनाएका
थिए ।
तीनकुनेमा भएको राजावादी आन्दोदनका उनी मुख्य कमाण्डर हुन् । तर हिंसा चर्किएपछि उनी लगत्तै फरार भएका थिए।
त्यही घटनामा प्रहरीले राष्ट्रिय प्रजातन्त्र पार्टी (राप्रपा) का वरिष्ठ उपाध्यक्ष रवीन्द्र मिश्र र महामन्त्री तथा सांसद धवलशमशेर राणासहित दर्जनौं आरोपितलाई पक्राउ गरिसकेको छ।

  काठमाडौं । काठमाडौंबाट रामेछाप जाँदै गरेको बस काभ्रेको रोशीमा दुर्घटना भएको छ । काठमाडौंबाट उमाकुण्ड गाउँपालिका बाम्तीभण्डार जाँदै गरेको बस बिहीबार बिहान रोशी गाउँपालिका-९ दाउन्नेस्थित बीपी राजमार्गमा दुर्घटना भएको हो ।
प्रदेश ३-०१–००६ ख १३३९ नम्बरको बस बिहान साढे ८ बजेतिर सडकबाट चिप्लिएर बाँसको झ्याङमा खसेको प्रहरीले जनाएको छ । दुर्घटनामा ११ जना घाइते भएका छन् ।
घाइतेमध्ये एक जनाको अवस्था गम्भीर छ । सबै प्राथमिक स्वास्थ्य केन्द्र मंगलटारमा उपचार भइरहेको प्रहरीको भनाय छ ।
बस चिप्लिएर खाँदबारीबाट काठमाडौंतर्फ आउँदै गरेको मे१ख ३३९४ नं को हाइस पनि ठोक्किएको थियो । हाइसका यात्रु भने सकुशल छन् । बस चालकलाई प्रहरीले नियन्त्रणमा लिएको छ ।