आन्दोलनमा गैरजेन–जीले उत्पात मच्चाएर स्वार्थको रोटी सेक्ने काम गरेः प्रदीप पौडेल

नेपाली कांग्रेसका नेता एवं निर्वतमान स्वास्थ्य तथा जनसंख्या प्रदीप पौडेलले आन्दोलनका क्रममा गैरजेन–जीले उत्पात मच्चाएर स्वार्थको रोटी सेक्ने काम गरेको बताएका छन् । रामेछापमा भएको अन्तक्र्रिया कार्यक्रममा उनले समाजमा जकडिएका र दल तथा व्यवस्थाले सुधार गर्न नसकेका विषय जेन–जी आन्दोलनले उठाएकाले अब रुपान्तरणको यात्रामार्फत सम्बोधन हुनुपर्ने बताए ।
‘जेन–जी आन्दोलन विषयविहीन थिएन । समाजमा जकडिएर बसेका दलहरुले सुधार गर्न नचाहेको तथा नसकेका विषयहरु थिए’, उनले भने, ‘नीतिगत प्रावधानभित्र भएका विषयले हुर्काएका कुरा आन्दोलनले उठाएको छ ।’
आन्दोलनका क्रममा पहिलो दिनमै त्यति धेरै युवाले सहादत प्राप्त गरेको विषयसमेत गम्भीर भएकाले छानबिन हुनुपर्ने उनले बताए । ‘नेपालमा अहिलेसम्मकै ठूलो क्षति भएको छ,’ उनले भने, ‘आन्दोलनभित्र छिरेर गैरजेन–जीले उत्पात मच्चाउने र स्वार्थको रोटी सेक्ने काम गरे । राष्ट्रिय अन्तर्राष्ट्रिय स्वार्थहरू त्यसभित्र घुसेर परिस्थिति यस्तो भयो ।’
पौडेलले यस क्रममा भएको क्षतिले राज्यले आफ्नो सम्पत्ति र नागरिकको सम्पत्ति रक्षा गर्न सक्ने विषय प्रश्नका रुपमा खडा भएको भन्दै यसको छानबिन आवश्यक रहेको बताए । ‘युवाहरूको सहादत र व्यक्ति तथा राज्यको सम्पत्ति दुवैको असुरक्षा र विनाशलाई गम्भीर रुपमा हेरिनुपर्छ । यसलाई सामान्य रुपमा लिन सकिन्न, यो सरकारले छानबिन गर्नुपर्छ,’ उनले भने ।

आफू यस्तो परिस्थितीमा पदमा बस्नु उचित हुँदैन भनेर २३ भदौमा नै राजीनामा दिने मनस्थितिमा भए पनि पार्टीसँग छलफल आवश्यक भएकाले भोलिपल्ट राजीनामा दिएको बताए । ‘प्रधानमन्त्रीलाई राजीनामा बुझाउन र उहाँलाई समेत यो अवस्थामा पदमा बसिरहन हुन्न भनेर म बालुवाटार जाँदै थिएँ’, उनले भने ।
त्यसबीचमा परिस्थिति बदलिएकाले सामाजिक सञ्जालबाट राजीनामा दिएका भन्दै उनले आफ्नै व्यवस्थापनमा सुरक्षित बसेको बताए ।