वीरेन्द्रनगरको वडा नम्बर १ को कार्यालयले आइतबारदेखि नगरपालिकाबाटै वडाका अत्यावश्यक सेवा सुचारु गर्ने तयारी गरेको छ । वडा कार्यालयले सेवाप्रवाह निरन्तर गर्न नगरपालिकासँग सहकार्य गरिरहेको छ । तर सबै सेवा भने निरन्तर हुने छैनन् । ‘हामीले सहकार्य गरिरहेका छौं, आइतबार (असोज ५) देखि अत्यावश्यक सेवा नगरपालिकको कार्यालयबाटै दिन सकिन्छ कि भन्ने छ,’ वडाध्यक्ष दिनेश खत्रीले भने, ‘कार्यालयबाट सेवा सुचारु गर्न सकिने सम्भावना नै छैन, जल्न बाँकी सामान केही पनि छैनन् ।’
वडा कार्यालयबाट सम्पादन हुने कामका लागि सेवाग्राहीले दैनिक फोन गर्ने गरेको उनले बताए । ‘अहिले सेवाहरु सबै ठप्प छन्, सेवाग्राहीले दैनिक फोन गरिरहनु भएको छ, तैपनि सम्बोधन गर्न मिल्ने अवस्था छैन ।’ खत्रीले भने । भएपनि सेवा दिन सकिने अवस्था छैन ।’
गत भदौ २३ र २४ गते भएको जेन–जी समूहको आन्दोलनका क्रममा वीरेन्द्रनगर उपत्यका क्षेत्रमा भएका १२ वटा वडा कार्यालयहरुमा क्षति भएको थियो । यी सबै कार्यालयहरुमा तत्काल सबै सेवा निरन्तर गर्न सकिने अवस्था छैन । केही वडाहरुले अत्यावश्यक सेवाहरु आ–आफ्नो तवरबाट सुचार गरेका छन् । कतिपय वडा कार्यालय अहिले पनि बन्द छन् ।
वीरेन्द्रनगरका १६ मध्ये वीरेन्द्रनगर उपत्यकामा अवस्थित १२ वडा कार्यालयको भवन, विद्युत प्रणाली, इन्टरनेत तथा सफ्टवेयर, कम्प्यूटर र प्रिन्टर जस्ता उपकरण, दस्तावेज, फर्निचर, खानेपानी लगायतका पूर्वाधारहरु पूर्णरुपमा जलेका छन् । आगलागीबाट जलेका वडा कार्यालयका भवनहरुसमे तत्काल उपयोग गर्न सकिने अवस्थाका छैनन् । आफ्नै भवनबाट सेवा दिइरहेका ती वडा कार्यालयका संरचनाहरु आगलागी र तोडफोडपछि निष्क्रिय जस्तै छन् । यी भवनलाई पुनः अघिकै अवस्थामा फर्काउन ठूलै खर्च लाग्ने देखिएको छ ।
वीरेन्द्रनगर नगरपालिका वडा नम्बर ११ का वडाध्यक्ष खिमलाल देवकोटाले तोडफोड र आगजनीका कारण वडा कार्यालयबाट तत्काल पूर्णरुपमा सेवा दिन नसकिएको बताए । आगजनीका कारण वडा कार्यालयका सम्पूर्ण कागजी दस्तावेजसँगै भौतिक सामग्रीमा पूर्णरुपमा क्षति पुगेको उनले बताए । कार्यालयको सेवा पूर्णरुपमा कसरी सुचारु गर्ने भन्नेमै अन्योल रहेको वडाध्यक्ष देवकोटाले बताए ।
‘आगजनी तथा तोफोडले वडा कार्यालयबाट नागरिकले पाउने जन्म, मृत्यु, विवाह, सम्बन्ध विच्छेद र बसाइँसराइ दर्ता लगायतका कार्य पूर्णरुपमा रोकिएका छन्,’ उनले भने, ‘यससँगै नागरिकता बनाउन आवश्यक पर्ने सिफारिस, बसोबास प्रमाणपत्र र वैवाहिक स्थिति प्रमाणित गर्ने कार्य पनि रोकिएका छन्, सहज तरिकाले कसरी सुचारु गर्ने भन्ने अन्योल छ ।’ तत्कालका लागि सरकारले उपलब्ध गराउँदै आएको सामाजिक सुरक्षा भत्ता वितरण कार्य पनि प्रभावित बनेको देवकोटाले बताए ।
आन्दोलनमा सहभागी भएकाहरुले वडा कार्यालयमा भएका दस्तावेजहरु छानीछानी जलाएको वडा नम्बर १२ का अध्यक्ष चुडामणि चपाईले बताए । तोडफोड र आगजनी गर्नुअघि कार्यालयमा रहेका सोफा, टेबल, कम्यूटर, प्रिन्टर लगायतका भौतिक सामग्री निकालिएको उनले बताए । ‘वडामा केही व्यक्तिले घुसपैठ गरेर नियतवस् क्षति पु¥याएको देखिन्छ, उनीहरु लुटपाट गर्ने उद्देश्य प्रष्ट भएको छ,’ चपाईले भने ।’ क्षतिपछि कसरी सेवा सुचारु गर्नेमा आफूहरु पनि अन्योलमा रहेको उनले बताए ।
वीरेन्द्रनगर नगरपालिकाका नगर प्रमुख मोहनमाया ढकालले आगजनी र तोडफोडबाट वडा र नगरपालिकामा २० करोड बढीको क्षति भएको आँकलन गरिएको बताइन् । जेन–जी आन्दोलनका नाममा घुसेका अराजक व्यक्तिका कारण जनताको नजिकमा रहेर काम गर्ने सरकारको संरचनामा निष्क्रिय हुनेगरि क्षति पु¥याएको उनले बताइन् ।
‘तत्काल क्षति भएका कुनै पनि वडा कार्यालयमा बसेर काम गर्न सकिने अवस्था छैन, केही समयका लागि अत्यावश्यक सेवा दिन नगरपालिकाको कार्यालयबाट वडाको काम गर्ने प्रयास भईरहेको छ,’ मेयर ढकालले भनिन्, ‘वडा कार्यालयबाट हुने सेवाप्रवाहलाई नियमित बनाउन धेरै समय लाग्ने देखिन्छ ।’
वडा कार्यालयमा भएको क्षतिले सेवासँगै राजस्व संकलनमा समेत समस्या भएको छ । यसले तत्काल आवश्यक पर्ने उपकरण तथा कागजात खरिदमा समस्या भएको छ ।
