मधेस प्रदेशका मुख्यमन्त्री सतिशकुमार सिंहले संविधान र संघीयता जोगाउन आफूले राजीनामा नदिएको दाबी गरेका छन् ।
संविधान दिवसको अवसरमा शुक्रबार प्रदेश सरकारले आयोजना गरेको कार्यक्रमलाई सम्बोधन गर्दै मुख्यमन्त्री सिंहले यस्तो बताएका हुन् ।
भष्ट्राचार उन्मुलन र संविधानका केही प्रवधान संशोधनका लागि जेनजी आन्दोलन भएपनि संघीयता र संविधानविरोधी तत्वले आन्दोलनमा घूसपैठ गरी संघियता र संविधानमाथि नै आक्रमण गर्न खोजेको अवस्थामा आफूले राजीनामा नदिने दोहोर्याए । ‘जेन—जी आन्दोलनमा समर्थन जनाएर नै समाजिक सञ्जालमार्फत राजीनामा दिएको साँचो हो’, मुख्यमन्त्री सिंहले भने, ‘तर जब मलाई आफ्नै पार्टीका केही व्यक्ति संविधन र संघियता विरोधीसँग मिलेको भान भयो, त्यसपछि मैले राजीनामा नदिने मनसाय बनाएँ ।’
मधेश प्रदेश संघीयताको जननी रहेको भन्दै उनले विषम परिस्थितिमा मुख्यमन्त्रीबाट राजीनामा दिए भागेको पुष्टि हुने उनको जिकिर छ । यस्तो भए इतिहासमा आफूलाई भगौडा मुख्यमन्त्रीका रूपमा बदनाम हुने चिन्ता उनले सुनाए । उनले भने, ‘त्यसकारण मैले विश्वासको मत लिन्छु र मलाई लाग्छ, अहिलेको अवस्थामा सरकार परिवर्तनको आवश्यकता छैन ।’
राष्ट्रपति रामचन्द्र पौडले संविधान र संघीयता जोगाउन खेलेको भूमिकाजस्तै भविष्यमा आफ्नो कामको जनताले मूल्याङ्कन गर्ने उनले बताए । हिजो पार्टीले तीन दिनभित्र स्पष्टीकरण पेस गर्न भनेको उल्लेख गर्दै मुख्यमन्त्री सिंहले भने, ‘केही व्यक्तिको उक्साहटमा पार्टीले मलाई स्पष्टीकरण सोधेको छ । तर जब पार्टीले सत्यता थाहा पाउँछ, त्यसपछि मैले नै लिएको अडानमा सहमत हुन्छ ।’
Leave a Reply