पूर्वराष्ट्रपति विद्यादेवी भण्डारीले जेनजीको नाम अगाडि राखेर हिंसात्मक विध्वंश मच्चाउने गतिविधि भएको बताएकी छन्। शुक्रबार जेनजी प्रदर्शनका क्रममा भएका घाइतेहरू भेट्न प्रहरी अस्पताल पुगेकी उनले आन्दोलनबाट ठूलो क्षति भएको बताउँदै नेपाल प्रहरीलाई आत्मबल प्रदान गर्नुपर्ने पहिलो काम रहेको बताइन्। उनीहरू बस्ने भौतिक संरचनाहरू बनाउनुपर्ने आवश्यकता रहेको पनि बताइन्।
शान्तिपूर्ण ढंगले आफ्ना मागहरू राख्ने भन्दै आन्दोलनमा उत्रिएका जेनजीको आवरणमा हिंसात्मक विध्वंश मच्चाउने काम भएको उनले बताइन्। यसबारे राम्रोसँग अध्ययन हुनुपर्ने उनले बताइन्। राष्ट्रिय सम्पत्तिको यसरी विध्वंश गरेर देशको विकास नहुने उनको जिकिर थियो। उनले भनिन्, ‘नेपाल प्रहरीको ठूलो क्षति भएको छ। यसमा राज्यले समयमा नै हेरेर भौतिक व्यवस्थाका साथसाथै जुन ढंगले उहाँहरूलाई आवश्यक पर्ने सामग्री उपलब्ध गराउनुपर्छ। २३ गतेको घटना सामान्य रूपमा हेरेको हो। नयाँ पुस्ता जसलाई जेनजीको रूपमा परिभाषित गरेका छन्। उहाँहरू शान्तिपूर्ण ढंगले नै केही जिज्ञासा देखाउने भनेर लाग्नुभएको भन्ने बुझेको हो। त्यो स्थिति रहेन। उहाँहरूले पनि प्रशासनसँग पनि शान्तिपूर्ण रूपमा प्रदर्शन गर्छौं भनेपछि प्रशासनको पनि त्यति ध्यान गएन। तर जेन जीको नाम अगाडि राखेर हिंसात्मक विध्वंश मच्चाउने गतिविधि भयो। यसको राम्रोसँग अध्ययन अनुसन्धान गर्नुपर्छ। जे भयो यो एकदमै गलत भयो। शान्तिपूर्ण ढंगले आन्दोलनमा निस्किएकाहरूप्रति कसरी प्रहारहरू भयो त्यो पनि बुझ्नुपर्छ। कता पट्टिबाट सुरू भयो भन्ने कुरा। कसरी अचानक रूपमा आयो। राष्ट्रिय सम्पत्तिको यसरी विध्वंश गरेर देशको विकास चाँडै हुँदैन।’
उनले आन्दोलनकारीका नाममा लुटपाट, आगजनी र तोडफोड भएको बताइन्। आवेग, उत्तेजना भन्दा माथि उठेर राष्ट्रिय भावना र सर्वोपरी हित हुनेगरी काम गर्नुपर्ने उनले बताइन्। बदला र प्रतिशोधमा कोही जान नहुने उनको कथन थियो।
Leave a Reply