स्पेन र आयरल्यान्डले दियो प्यालेस्टाइनलाई छुट्टै मुलुकको मान्यता

स्पेन र आयरल्यान्डले प्यालेस्टाइनलाई छुट्टै राष्ट्रको मान्यता दिएको छ। स्पेनका प्रधानमनत्री पेद्रो साञ्चेजले प्यालेस्टाइनलाई छुट्टै राज्यको मान्यता दिइएको घोषणा गरेका हुन्।

स्पेनको उक्त निर्णयसँगै विश्वका १४० मुलुकमध्येको एक बनेको छ। जसले स्पेनलाई यसअघि नै मान्यता दिइसकेको छ।

स्पेनका प्रधानमन्त्री साञ्चेजले भने, ‘यो निर्णय गर्नुको एकमात्र उदेश्य भनेको इजराइल र प्यालेस्टाइनबीच शान्तिको प्रयासमा योगदान दिनु।’

यस्तै, आयरल्यान्डले पनि औपचारिक रूपमा प्यालेस्टाइनलाई छुट्टै मुलुकको रुपमा मान्यता दिएको छ।

आयरल्यान्डले मङ्गलवार प्यालेस्टाइनलाई छुट्टै मुलुकको मान्यता दिँदै विश्वको कुरा सुन्न र गाजामा देखिरहेको मानवीय प्रकोप रोक्न इजराइली प्रधानमन्त्री बेन्जामिन नेतान्याहुसँग आग्रह गरेको छ।

आइरिस प्रधानमन्त्री साइमन ह्यारिसले मन्त्रिपरिषद् बैठकमा उक्त कदममा हस्ताक्षर गरेलगत्तै एक विज्ञप्तिमा भने, ‘हामीले शान्ति प्रक्रियाको अन्त्यमा प्यालेस्टिनलाई मान्यता दिन चाहेका थियौँ, यद्यपि हामीले शान्तिको चमत्कारलाई जीवित राख्नका लागि स्पेन र नर्वेसँग यो कदम चालेका छौँ।’

तीन मुलुकको घोषणाप्रति इजराइली सरकारबाट क्रुद्ध प्रतिक्रिया आएको छ। ती मुलुकले हमासलाई अक्टोबर ७ को आक्रमणका लागि पुरस्कृत गरिरहेको इजराइलको तर्क छ। रासस