एनसेलको रोमिङ शुल्क घट्यो, सम्बन्धित देशको सिम पनि लिइरहन नपर्ने

एनसेलका ग्राहकहरूले अब उत्कृष्ट रोमिङ अफरको फाइदा लिँदै विभिन्न देशको यात्रा गर्दा अझसुलभ दरमा अनलिमिटेड दैनिक डेटा सेवा प्रयोग गर्न सक्ने भएका छन् ।

प्रयोगकर्तालाई मोबाइल डेटामार्फत सधैं अन अर्थात् अनलाइन राख्ने प्रतिवद्धतासहित एनसेलले आफ्नो रोमिङ डेटा शुल्कमा उल्लेख्य रुपमा घटाएको हो ।

एनसेलले अमेरिका, संयुक्त अरब इमिरेट्स (यूएई), कतार, चीन, बेलायत र थाइल्याण्डमा दैनिक डेटा रोमिङ शुल्क घटाएको हो ।

प्रयोगकर्ताले अब भ्रमणका बेलामा पनि आफ्ना एसएमएस अलर्टहरु पाउनेछन् भने जुन देशको भ्रमणमा गएको हो त्यहाँको सिम लिइरहनु पर्ने बाध्यता पनि हटेको एनसेलको भनाइ छ ।

डेटा रोमिङ प्याकको शुल्क परिमार्जनसँगै ग्राहकले कर सहित दैनिक मात्र ७९.८८ रुपैयाँमा अमेरिका, युएई र कतारमा रहँदा दैनिक डेटा प्याक प्रयोगबाट फाइदा लिन सक्छन् । यसअघि यो शुल्क दैनिक १९०.१८ रुपैयाँ थियो ।

त्यस्तैगरी चीन, बेलायत र थाइल्याण्ड भ्रमणमा जाने एनसेलका ग्राहकहरुले करसहित मात्र १९०.१८ रुपैयाँमा प्रति दिन डेटा सेवाको फाइदा लिन सक्छन् । यसअघि ती देशमा दैनिक डेटा रोमिङ शुल्क ६३३.९३ रुपैयाँ थियो ।