Category: News

आइसिसी टि–२० विश्वकप एसिया र इस्ट एसिया प्यासिफिक छनोटमा नेपालल आज समूह चरणको आफ्नो दोस्रो तथा अन्तिम खेलमा जापानसग खेल्दै छ।
खेल शुक्रबार ओमानको अल अमेरतस्थित ओमान क्रिकेट एकेडेमी टर्फ–१ मा नेपाली समयअनुसार दिउँसो ४ः१५ बजेदेखि सुरु हुनेछ।
नेपालले पहिलो खेलमा कुवेतमाथि ५८ रनको जित निकालेको थियो। नेपालले एक खेल अगाडि नै सुपर सिक्समा स्थान पक्का गरिसकेको छ।
नेपाल आज जापानलाई पराजित गरेर समूह विजेता बने लक्ष्यसहित मैदानमा आउने छ। टी–२० अन्तर्राष्ट्रिय क्रीकेटमा नेपाल र जापान पहिलो पटक प्रतिस्पर्धा गर्दै छन्।

हुम्लाको चंखेली गाउँपालिका–४ देशीखोला नजिक जिप दुर्घटना हुँदा तीन जनाको मृत्यु भएको छ । मेल्छामबाट गाउँपालिकाको केन्द्र पिप्लाङतर्फ जाँदै गरेको कर्णाली प्रदेश ०२–००१ च १०९१ नम्बरको डबल क्याब जिप शुक्रबार दुर्घटनाग्रस्त भएको जिल्ला प्रहरी कार्यालय हुम्लाले जनाएको छ ।
मेल्छाम प्रहरी चौकीका प्रमुख प्रहरी सहायक निरीक्षक चक्रबहादुर सिंहका अनुसार दुर्घटनामा चंखेली गाउँपालिका–६ की बसन्ती बुढाका आमा–छोरा र सोही वडाका मानवीर बुढाको घटनास्थलमै मृत्यु भएको हो ।
दुर्घटनामा कैलाश सिरा, चालक बहादुर लामा, महेन्द्र रोकाया, हंस बुढा, देवाङ्स बुढा, अनुपमा रोकाया, पार्वती बुढा र विमला बुढा घाइते भएका छन् । घाइतेहरुलाई उपचारका लागि स्थानीय स्वास्थ्य संस्थामा लगिएको प्रहरीले जनाएको छ ।

नेपाली कांग्रेसमा १५ औं महाधिवेशनको मिति र प्रक्रियाका बारेमा अन्योलता कायमै रहने गरी नेताहरूको अभिव्यक्ति आएका छन् । बिहीबारबाट पार्टी मुख्यालय सानेपामा सुरु पदाधिकारी तथा पूर्वपदाधिकारीको बैठकमा पनि नेताहरू विभाजित देखिएका छन्, महाधिवेशन कहिले भनेर ।
पार्टीका प्रवक्ता प्रकाशशरण महत महाधिवेशन गराउन वर्तमान कार्यसमितिको म्याद थपेर जानुपर्ने पक्षमा छन् । उनले भनेका छन्, ‘पार्टीभित्र केही समय म्याद थप गरेर जानुपर्छ भन्ने मत पनि छ ।’ अहिले पार्टिसँग क्रियाशील सदस्यताको विवरण नै नभएको र नयाँ सदस्यता वितरणसमेत नभएको अवस्थामा आवश्यक समय सर्वसम्मतिबाट थपेर नियमित महाधिवेशनको कार्यातालिका पारित गर्दै प्रक्रिया सुरु गर्नुपर्ने उनको भनाइ छ ।
मंसिरमा महाधिवेशन गरेर जान समय नपुग्ने धारणा अन्य नेताहरूको पनि छ । कांग्रेस सहमहामन्त्री महेन्द्र यादव, उमाकान्त चौधरीले मंसिरमा हचुवामा भरमा महाधिवेशन गर्न नसकिने बताएका छन् । फागुनको आम चुनाव फेस गरेर मात्र पार्टी निर्वाचन गर्नुपर्ने धारणा राख्नेहरू संस्थापन समूहमा छन् ।
‘चुनावपछि महाधिवेशन गरेर जान सकिन्छ । बाहिर हल्ला आयो भन्दैमा हामी घर फुटाउन लाग्नु हुँदैन । अहिले अन्तरिम सरकारको नेतृत्व पनि ७० काटेकै व्यक्तिले गर्नुभएको छ ।’ उनीहरूको भनाइ उद्धृत गर्दै अर्का पदाधिकारीले भने, ‘उहाँहरू त निर्वाचन फेस गरेर मात्र महाधिवेशन गरौँ भन्ने पक्षमा हुनुहुन्छ । उहाँहरूभन्दा पनि संस्थापन पक्षको यो लाइन छ ।’
बैठकमा कार्यकारी तोकेर महाधिवेशनसम्म जाने कि देउवा नै सभापति रहेर महाधिवेशन गर्ने भन्नेबारे निर्णय गर्न देउवालाई नै छाड्नुपर्ने कुरा उठेको थियो । यो कुरा उठेपछि महामन्त्रीद्वय, उपसभापति गुरुङलगायतले अहिले कार्यकारी तोकेर जानेभन्दा पनि विशेष महाधिवेशनमा नै जोड दिनुपर्ने कुरा राखे ।
संस्थापन इतर समूहका नेताहरुले नियमित महाधिवेशन गर्न समय अपुग हुने भएकाले आगामी मंसिरमा १५ औं महाधिवेशन गर्न नसकिने बताएका थिए । सहमहामन्त्री उमाकान्त चौधरीले अर्को वर्षको वैशाखमा महाधिवेशन गर्नुपर्ने बताएका छन् । ‘हामीसँग आवश्यक तयारी भएको छैन । यसैबीचमा चुनाव छ, आगामी वैशाखमा महाधिवेशन गर्नुपर्छ भन्ने मत उहाँको थियो,’ कांग्रेसका एक पदाधिकारीले भने । यस्तै मत अर्का सहमहामन्त्री महेन्द्र यादवको पनि मत यस्तै छ ।
संस्थापन समूहबाट महाधिवेशन पर धकेल्ने र वर्तमान कार्यसमितिको म्याद थप गर्नुपर्ने भनिरहँदा महामन्त्री गगन थापाले भने म्याद थप नगर्ने पक्षमा आफू रहेको बताएका छन् । ‘२६ असोजमा बस्ने केन्द्रीय समिति बैठकमा म यो केन्द्रीय समितिको म्याद थप गर्ने प्रस्ताव ल्याउँदिनँ । सभापतिको मात्र होइन, म आफैँ महामन्त्री छु, मेरै म्याद पनि नथप्ने पक्षमा म छु,’ महामन्त्री थापाले भने, ‘मंसिरमा यो कार्यसमितिको कार्यकाल सकिन्छ, अब नियमित महाधिवेशन गरौं । नियमित महाधिवेशन नगर्ने हो भने विशेष महाधिवेशन हुन्छ ।’ (शिलापत्र)

हुम्लाको चंखेली गाउँपालिका–४ देशीखोलामा जीप दुर्घटना हुँदा १२ जना यात्रु घाइते भएका छन् । कर्णाली प्रदेश ०२–००१ च १०९१ नम्बरको डबल क्याब जीप शुक्रबार बिहान करिब ११ बजे पिप्लाङतर्फ जाँदै गर्दा दुर्घटनामा परेको हो ।
जिल्ला प्रहरी कार्यालय हुम्लाका प्रहरी नायब उपरीक्षक शंकर पोखरेलका अनुसार घाइतेमध्ये तीन जनाको अवस्था गम्भीर रहेको छ । गम्भीर घाइतेहरुलाई हेलिकोप्टरमार्फत कर्णाली प्रदेश अस्पताल सुर्खेत ल्याउने तयारी भइरहेको प्रहरीले जनाएको छ ।

माइतीघरमा प्रदर्शन गर्न खोजेको आरोपमा पक्राउ पर्नेको संख्या १४ पुगेको छ । प्रहरीले डा. निकोलस भुसाल, सञ्जिव दाहालसहित १४ जनालाई पक्राउ गरेको हो ।
जिल्ला प्रशासन कार्यालय काठमाडौंले कसैलाई पनि प्रदर्शनका लागि अनुमति नदिएको अवस्थामा उनीहरू प्रदर्शन गर्न भन्दै माइतीघर पुगेपछि पक्राउ गरिएको जिल्ला प्रहरी परिसर काठमाडौंका एसपी तथा प्रवक्ता पवनकुमार भट्टराईले बताए ।
जेन–जीका विभिन्न समूहहरू माइतीघरमा प्रदर्शन गर्ने भन्दै पुगेका थिए ।
अहिले प्रहरीले माइतीघर नयाँ बानेश्वर क्षेत्रमा सुरक्षा व्यवस्था कडा पारेको छ । बाक्लो मात्रामा नेपाल प्रहरी र सशस्त्र प्रहरी परिचालन भएका छन् ।

सरकार गठनको करिब एक महिना हुँदा पनि जेनजीको मागहरू पूर्ण रूपमा पूरा नभएको भन्दै आज माइतीघरमा आन्दालेन गर्न पुगेका जेनजी अगुवा डा. निकोलस भुसालसहित तीन जना पक्राउमा परेका छन् ।
नागरिक सरकारले नै जेनजीको मागलाई बेवास्ता गरेको भन्दै केही व्यक्तिहरूले माइतीघर मण्डलामा प्रदर्शन गर्न उत्रिएपछि प्रहरीले उनीहरूलाई पक्राउ गरेको हो । पक्राउ पर्नेहरूमा डा.निकोलस भुसाल, एसपी साह र सञ्जि दाहाल रहेका छन्। जिल्ला प्रशासन कार्यालय काठमाडौंले कुनै पनि प्रकारको धर्ना, जुलुस र प्रदर्शनका लागि अनुमति नदिएको अवस्थामा प्रदर्शन गर्न पुगेपछि उनीहरू पक्राउमा परेका हुन् ।

बिरामीको चाप बढेसंगै जिल्ला अस्पताल दैलेखले बिरामीहरूलाई कुर्चीमै राखेर उपचार गरेको छ । २०४२ सालमा ओपिडीका रूपमा बनाइएको साँगुरो भवनमा बेड अभाव हुँदा कुर्चीमै राखेर उपचार गर्न थालिएको हो ।
१५ शय्याको क्षमता रहेको उक्त अस्पतालमा बिरामीको चाप अत्यधिक बढेपछि हाल ५८ बेडसम्मको व्यवस्थापन गरेर सेवा सञ्चालन भइरहेको स्वास्थ्य सेवा कार्यालय दैलेखका प्रमुख डाक्टर मनोज विश्वकर्माले जानकारी दिए। उनका अनुसार वर्षातसँगै ज्वरोका बिरामी बढेका छन् भने बालबालिकामा निमोनिया र ज्येष्ठ नागरिकमा दमका बिरामी बढी आउने गरेका छन् ।
‘गत वर्षको तुलनामा यस वर्ष गर्भवती र सुत्केरीको संख्या पनि उल्लेख्य रूपमा बढेको छ,’ डा. विश्वकर्माले भने, ’बिरामीको चाप बढी हुँदा बाहिरबाट बेड ल्याएर थप्ने गरेका छौं । अत्यधिक भीड हुँदा बेड अपुग हुँदा कुर्चीमै राखेर पनि उपचार गर्नुपरेको छ ।’
अस्पतालका अनुसार सुत्केरी वार्डमा पनि समस्या चर्किएको छ। १० शय्याको प्रसुति वार्डमा क्षमताभन्दा बढी सुत्केरीहरू हुँदा समस्या झन थपिएको छ । अस्पतालले प्रसुति वार्डमा पनि बेडहरू थपेर सेवा दिएको जनाइएको छ । महिनामा कम्तीमा २५ देखि ३० जनासम्मका शल्यक्रिया मार्फत प्रसुति हुने गरेको अस्पताल प्रमुख डा.विश्वकर्माले बताए । हाल जिल्ला अस्पतालमा ९ जना चिकित्सक कार्यरत छन् ।
जिल्लामा अनुभव भएका डाक्टरहरू आएसंगै सुर्खेत र नेपालगंज जाने बिरामीहरू जिल्ला अस्पतालमै आउन थालेका हुन् । जसका कारण अस्पतालमा सेवा लिन आउनेहरू बढेका बेला पछिल्लो समय मौसमी बिरामीहरू बढी हुँदा अस्पताललाई सेवा दिन हम्मेहम्मे परेको छ । बिरामी बढी हुँदा निजि मेडिकलमा समेत जाने गरेका छन् । निजी मेडिकलले चर्को मूल्यमा उपचार गरेको समेत गुनासो आएको छ । हिजोआज दैलेखमा सञ्चालनमा आएका मेडिकलमा समेत अनुगमन हुनुपर्ने आवाज उठेको छ । स्वास्थ्यकर्मीहरूका अनुसार नयाँ अस्पताल भवन ठेकेदारले समयमा निर्माण नगरेका कारण अस्पतालमा थप समस्या देखिएको छ। विगतमा अस्पताल म्याद थपिए पनि काम हुन सकेन । जसका कारण अहिले ठेकेदारले पटक–पटक म्याद थपका लागि पत्र पठाए पनि काममा प्रगति नदेखिएपछि म्याद विस्तारको प्रक्रिया रोकिएको जनाइएको छ ।
५० शय्याको सुविधासम्पन्न भवन निर्माण कार्य ढिलो हुँदा २०४२ सालमा बनेको पुरानो बिरामी चेकजाँच भवनबाटै अहिले बिरामीहरूलाई कोचाकोच गरी उपचार गर्नुपरेको अस्पतालले जनाएको छ ।
चार वर्षअघि अस्पतालको नयाँ भवन बनाउन सुरु भए पनि ठेकेदारले काम ढिलासुस्ती गर्दा बन्न सकेको छैन । कर्णाली प्रदेश सरकारको १८ करोड २३ लाख ९९ हजार ३ सय ८१ मा ३ वर्षभित्र सम्पन्न गर्ने सम्झौता भए पनि ठेकेदारले काम समयमा नगरेको पाइएको हो। ठेकेदार कम्पनीले प्रदेश सरकारले आफूलाई कामअनुसार पैसा नदिएका कारण ढिलाइ हुन गएको दाबी गरेको छ ।

सुर्खेत प्रहरीले जेनजी आन्दोलनका क्रममा कारागारबाट भागेका तीन जना कैदीलाई नियन्त्रणमा लिएको छ । जिल्ला प्रहरी कार्यालय सुेर्खेतको टोलीले जिल्लाका विभिन्न क्षेत्रमा लुकीछिपी बसेका कैदीहरुलाई बुधबार पक्राउ गरेको हो ।
जिल्ला प्रहरी कार्यालयका अनुसार नकबजनी चोरी मुद्दामा ३ महिना ९ दिन कैद सजाय फैसला भएका सुर्खेतको वीरेन्द्रनगर– ९ का सुशिल बोगटी, कर्तव्य ज्यान मुद्दामा २० बर्ष कैद सजाय भोगिरहेका सुर्खेतको लेकवेशी नगरपालिका–२ का गिरबहादुर दमाई र जबर्जस्ती करणी मुद्दामा फैसला नभई पूर्पक्षका लागि थुनामा रहेका जाजरकोटको जुनीचाँदे गाउँपालिका–११ का प्रेमबहादुर चदारालाई पक्राउ गरिएको हो ।
उनीहरु तीनै जना भदौ २४ गतेको जेनजी आन्दोलनका क्रममा कारागारबाट भागेका थिए । नियन्त्रणमा लिईएका सबैलाई आवश्यक कारबाहीका लागि सुर्खेत जिल्ला अदालतमा पठाईएको छ । उनीहरुलाई भागेको सम्बन्धित कारागारमा पनि पेश गरिएको जिल्ला प्रहरी कार्यालय सुर्खेतका प्रवक्ता डिएसपी मोहनजंग बुढथापाले जानकारी दिए ।