कारको ठक्करबाट पैदल यात्रीको मृत्यु पछि रत्न राजमार्ग अवरुद्ध

वीरेन्द्रनगरको रत्न राजमार्ग अवरुद्ध बनेको छ। रत्न राजमार्ग घुस्रारोड चौकमा बुधवार राति पैदल यात्रीलाई कारले ठक्कर दिएको थियो।

ठक्करबाट घाईते वीरेन्द्रनगर नगरपालिका–१२ का ७२ वर्षीय लोक बहादुर शाहीको उपचारको क्रममा बुधवार राति नै प्रादेशिक अस्पतालमा मृत्यु भयो। मृत्युपछि आफन्तहरुले बुधवार रातिदेखि घुस्रारोड चौक (रत्न राजमार्ग) मा टायर बालेर सडक अवरुद्ध गरेका छन्।

उनीहरुले घटनामा संलग्नहरुको खोजी गरी सार्वजनिक गर्नुपर्ने भन्दै आन्दोलन गरिरहेका छन्। सडक अवरुद्ध हुँदा उक्त राजमार्ग हुँदै आवतजावत गर्ने सवारीसाधनलाई समस्या भएको छ।

प्रहरीले घटनामा संलग्न गाडीको खोजी कार्य भईरहेको बताएको छ। प्रहरी रातिदेखि नै गाडीको खोजीमा लागिरहेको र छिटटै घटनामा संलग्न गाडी पत्ता लाग्ने सुर्खेतका प्रहरी प्रमुख रुपेश खड्काले बताए।