उन्नति बोहोरा शिलालाई राष्ट्रिय विभूति जयपृथ्वीबहादुर सिंह सम्मान-२०८१

ह्यापी किड्स मन्टेश्वरी होम राइजिङ स्टारले साहित्यकार उन्नति बोहोरा शिलालाई राष्ट्रिय विभूति जयपृथ्वीबहादुर सिंह सम्मान-२०८१ बाट सम्मान गरेकाे छ। ह्यापी किड्स मन्टेश्वरी होम राइजिङ स्टार स्कुलका प्रधानाध्यापक कृष्णकुमार बोहराको अध्यक्षता तथा बहुआयामिक व्यक्तित्व नवराज कार्कीको प्रमुख आतिथ्यमा कार्यक्रम भएको हो।

प्रमुख अतिथि नवराज कार्कीले दीप प्रज्वलन गरेर शुभारम्भ भएको कार्यक्रममा सम्मानित व्यक्तित्व शीलाको फर्की आऊ शान्ति तिमी स्वदेश गीतमा विद्यार्थीहरूले नृत्य प्रस्तुत गरेका थिए।

पहिलो नेपाली नारी नियात्राकार रञ्जुश्री पराजुली, गोपीकृष्ण प्रसाईं, जलेश्वरी श्रेष्ठ, निर्मला बराल, डा. छायादत्त न्यौपाने, सविना पोखरेल, विन्दु सुवेदीले बालसाहित्यबारे बोलेका थिए।

कार्यक्रममा विद्यार्थीहरुले साहित्यकार लक्ष्मी उप्रेतीका कथासंग्रह डाँडाको सुरुङ कथासंग्रह र अंशु नङ नटोक्ने भइन् नाटकको समीक्षत्मक टिप्पणी गरेका थिए।

उक्त कृतिमाथि जेनिश केसी, समृद्धि पन्त आदि विद्यार्थीले गहन समीक्षा गरेका थिए। अशु नङ नटोक्ने भइन् पुस्तकको समीक्षा गर्दै समृद्धि पन्तले नाटक सन्देशमूलक भएको बताए। उनले नाटकले नङ टोक्न र मोबाइल हेर्न नहुने सन्देश दिएको बताए।

त्यस्तै कक्षा ४ का जेनिश केसीले नाटकले अभिभावकले गर्नु हुँदैन भनेको कुरा गर्दा दुख पाइने नाटकले सन्देश दिएको बताए। सरल र सजिलो शब्दले नाटक उत्कृष्ट भएको पनि उनले बताए।

कक्षा ४ का सामाग्री दाहालले नाटकले फोहोर कुरा मुखमा हाले ठूलो रोग लाग्ने बताउँदै त्यस्तो कुरा मुखमा नहाल्न सन्देश दिएको बताए।

कक्षा ५ का आरभ अर्यालले उप्रेतीको कथामा केही गाह्रो शब्द भए पनि पढ्दा निकै रमाइलो लागेको बताए। उनले जिद्दीवाल नहुन कथाले सुझाएको पनि बताए।

कार्यक्रमका अध्यक्ष कृष्णकुमार बोहोराले विद्यार्थीहरूलाई ज्ञान दिने लेखक र विद्यार्थीबिच सम्बन्ध जोड्न बालसाहित्यकारहरूको भेला गरेको बताए। उनले विद्यार्थीलाई सुरुवाती घडीमै बालसाहित्य सम्बन्धी जानकारी दिएर अगाडि बढाउन पनि कार्यक्रमको आयोजना गरेको बताए।

कार्यक्रममा प्रमुख अतिथि नवराज कार्कीले जयपृथ्वीबहादुर सिंहबारे बाेल्दै बालसाहित्यकारहरूका लागि यो सम्मान कार्यक्रम सुनौलो अवसर भएको बताए।

सम्मानित स्रष्टा शिलाले राष्टिय विभूति जयपृथ्वीबहादुर सिंहको नामको पुरस्कारले आफूमा ऊर्जा थपेको छ बताउँदै विद्यालय परिवार र उपस्थित महानुभावप्रति आभार व्यक्त गरेकी थिइन्।

कार्यक्रममा साहित्यकार जलेश्वरी श्रेष्ठले साहित्यकार प्राज्ञ लक्ष्मी उप्रेती आफू जस्ता धेरै लेखकको प्रेरणाको विन्दु रहेको बताइन्। उनले बालसाहित्य माग बढ्दै गएको पनि बताइन्।

पहिलाे नेपाली नारी नियात्राकार तथा साहित्यकार रञ्जुश्री पराजुलीले जनतामाझ लोकप्रिय जयपृथ्वीबहादुर सिंह जस्तो व्यक्तिको नाउँमा विद्यालयले पुरस्कार स्थापना गरेर ऐतिहासिक काम गरेको बताइन्। उनले आफूले पाएको पुरस्कारले लेखनमा सधैं ऊर्जा थपिरहेको पनि बताइन्।

त्यस्तै साहित्यकार विन्दु सुवेदीले स्रष्टा र बालबालिका बिच गरिएको यस्तो कार्यक्रमले विद्यार्थीलाई अगाडि बढ्न प्रेरणा मिल्ने बताए।

साइनोका प्रवर्तक तथा बालसाहित्यकार डा. छायादत्त न्यौपानेले राजसी सुविधा चटक्कै छोडेर देशको पक्षमा उभिएका जयपृथ्वीबहादुर सिंहको नाममा विद्यालयले उल्लेख काम गरेको बताए। उनले आमाहरूले लेखेको बालसाहित्य बालबालिकाका लागि भरपर्दो खुराक हुने गरेको पनि बताए।

साहित्यकार गोपीकृष्ण प्रसाईंले सत्यपथमा लागेका मानवतावादी राष्ट्रिय विभूति जयपृथ्वीबहादुर सिंहकाे नाममा स्थापना गरेको पुरस्कार उचित पात्रलाई दिएकाे भन्दै खुसी व्यक्त गरेका थिए।

त्यस्तै कार्यक्रममा साहित्यकार निर्मला बरालले सम्मानित व्यक्तित्व उन्नति बोहोरा शिला बहुआयामिक शालीन, भद्र र कोमल भएको बताइन्।

कार्यक्रममा बालसाहित्यकार श्रीराम राईले विद्यालयस्तरबाट गरिएका यस्ता कार्यक्रमले पठन संस्कृतिको विकास गराउनुकाे साथै बालबालिकाहरूलाई विविध क्षेत्रमा सक्रिय बनाउने बताए।